मेस्सीको राष्ट्रिय टोलीमा फर्किने मिती तय

एजेन्सी- रुस विश्वकपपछि अर्जेन्टिनी राष्ट्रिय टोलीबाहिर रहँदै आएका स्टार खेलाडी लियोनल मेस्सी राष्ट्रिय टोलीमा फर्किने मिती तय भएको छ । उनले आफू राष्ट्रिय टोलीमा फर्किन तयार रहेको सन्देश पठाएसँगै उनको राष्ट्रिय टोलीमा फर्किने मितीको तय भएको हो । 

उनी आगामी मार्च २२ तारिखमा भेनेज्वेलासागको मैत्रीपूर्ण खेल खेल्ने पक्का भएको छ । सो खेलका लागि मेस्सी करिब ९ महिनापछि राष्ट्रिय टोलीमा फर्किन लागेका हुन् । 

सो खेलको घोषणापछि प्रशिक्षक लियोनल स्कालोनीले मेस्सीलाई राष्ट्रिय टोलीमा फर्किन सन्देश पठाएकोमा मेस्सीले पनि कोपा अमेरिकाअघि नै राष्ट्रिय टोलीमा फर्किन तयार रहेको भन्दै अर्जेन्टिनी फुटबल संघ र प्रशिक्षकलाई जवाफ पठाएको अर्जेन्टिनी मिडियाले उल्लेख गरेका छन् । 

करिब डेढ महिनाअघि मेस्सीले भने एक अन्तर्वार्तामा आफू कोपा अमेरिका खेल्न टोलीमा फर्किने तयार रहेको बताएका थिए । तर, अहिले आएर उनी त्यसअगावै राष्ट्रिय टोलीमा फर्किन राजी भएका हुन् ।