सचिव कुटपिट प्रकरण : छानबिन समिततिले किन दिएन प्रतिवेदन ?

जनकपुरधाम- प्रदेश २ का उद्योग, वन तथा पर्यटन मन्त्रालयका सचिव विद्यानाथ झा उपर कुटपिट भएको १२ दिन बितिसक्यो । २९ पौषमा सचिव झालाई प्रदेश २ का अर्थमन्त्री विजय यादवले आफ्नै कार्यकक्षमा बोलाई कुटपिट गरेको आरोप लागेको छ ।

घटना भएलगत्तै प्रदेश सरकारले आन्तरिक मामिला तथा कानुनमन्त्री ज्ञानेन्द्र यादवको संयोजकत्वमा छानबिन समिति गठन गर्‍यो । घटनाको छानबिन गरी समितिलाई सात दिनभित्र आफ्नो प्रतिवेदन पेश गर्न भनिएको थियो ।

तर घटना घटेको झण्डै दुई सप्ताह बित्न लाग्दासमेत समितिले प्रतिवेदन पेश गर्न सकेको छैन् । समितिले प्रतिवेदन पेश नगरेपनि सचिव झामाथि कुटपिट गर्ने मन्त्री यादवलाई कारबाहीको माग राख्दै आन्दोलन थालेका कर्मचारीहरुले आन्दोलनसमेत स्थगित गरिसकेका छन् ।

समितिका संयोजक कानुनमन्त्री यादवले माघ १४/१५ गतेसम्म प्रतिवेदन सार्वजनिक गरिने जानकारी दिएका छन् ।  सचिवलाई कुटपिट गरेको आरोप लागेका अर्थमन्त्री यादव प्रदेश बाहिर रहेकोले प्रतिवेदनलाई अन्तिम रुप दिन समय लागेको उनले बताए ।

‘हामीले सबै प्रत्यक्षदर्शीहरुसँग कुराकानी गरिसेका छौं,’ नेपाल समयसँग कुरा गर्दै समितिका संयोजक मन्त्री यादवले भने,‘अर्थमन्त्रीज्यु काठमाण्डौं जानु भएको छ । उहाँ फर्के लगत्तै प्रतिवेदनले पूर्णता पाउने छ ।’

छानबिन समितिको प्रतिवेदन कस्तो हुने जिज्ञासामा मन्त्री यादवले पीडितले न्याय पाउने गरी प्रतिवेदन आउनने प्रतिक्रिया दिएका छन् । ‘प्रदेशको लागि दुर्भाग्यपूर्ण घटना भएको छ,’ उनले भने,‘सचिवज्यूको असन्तुष्टि समाप्त हुने गरी प्रतिवेदन आउँछ ।’

यद्यपी घटनामा कसैलाई कारबाही नहुने मन्त्री यादवले संकेत दिएका छन् । ‘कसैलाई कारबाही गरिए घाउ आफैलाई लाग्ने अवस्था छ,’ मन्त्री यादवले भने,‘घटनाको सत्यतथ्य प्रतिवेदनमा समावेश गरिन्छ । तर सहमति गरेर अगाडी बढ्न हाम्रो सुझाव छ ।’

गरिबी निवारण कोषअन्तर्गत लघु उद्यमसम्बन्धी कार्यक्रमका लागि आफूले सिफारिस गरेको एनजीओ छनौट नभएको निहुँमा सचिव झालाई आफ्नै कार्यकक्षमा बोलाएर मन्त्री यादवले कुटपिट गरेको आरोप छ ।