रामोसको दुई गोलमा रियल विजयी

एजेन्सी- जिरोनालाई पराजित गर्दै रियल मड्रिडले स्पेनिस कोपा डेल रे फुटबल अन्तर्गत क्वाटरफाइनलको पहिलो लेगमा जित निकालेको छ । बिहिबार राति भएको पहिलो लिगमा रियलले जिरोनालाई ४-२ ले पराजित गरेको हो ।

घरेलु मैदानमा रियलका लागि कप्तान सर्जियो रामोसले २ गोल तथा लुकास भास्क्वेज र करिम बेन्जिमाले एक एक गोल गरे । जिरोनाका एन्थोनी लोजानो र एलेक्स ग्रानेलले एक एक गोल गरे ।

खेलको सातौ मिनेटमा लोजानोले गोल गर्दै जिरोनालाई सुरुवाती अग्रता दिलाएका थिए । तर, खेलको १८ औ मिनेटमा लुकासले गोल गर्दै रियललाई खेलमा फर्काए । खेलको ४२ औ मिनेटमा कप्तान रामोसले पेनाल्टीमा गोल गरेपछि पहिलो हाफमा रियलले २-१ को अग्रता लियो ।

खेलको ६६ औ मिनेटमा जिरोनाका एलेक्सले गोल गर्दै खेल २-२ को बराबरीमा ल्याए । ७७ औ मिनेटमा कप्तान रामोसले व्यक्तिगत दोस्रो गोल गर्दा रियल ३-२ ले अघि रह्यो । त्यसपछि खेलको ८० औ मिनेटमा बेन्जिमाले गोल गर्दै रियललाई ४-२ को जित दिलाए ।