मार्सेलो इटालियन क्लब युभेन्ट्स जाने पक्का

एजेन्सी- ब्राजिलियन खेलाडी मार्सेलोले यस सिजनको अन्त्यसँगै स्पेनिस क्लब रियल मड्रिड छोड्ने भएका छन् । उनी यस सिजनको अन्त्यमा आफ्ना पूर्वसहकर्मी क्रिस्टियानो रोनाल्डोसँग खेल्न इटालियन क्लब युभेन्टस जाने पक्का भएको अन्तर्राष्ट्रिय सञ्चार माध्यमले बताएकोछ ।   

अन्तर्राष्ट्रिय सञ्चार माध्यमका अनुसार रियलले मार्सेलोको सरुवालाई ध्यानमा राख्दै उनको स्थानका लागि अर्को खेलाडीको खोजीसमेत गर्न थालेको छ । त्यसका लागि रियल बेटिसका लेफ्ट ब्याक जुनियर फिर्पोलाई भित्र्याउने तयारी गरेको बताइएको छ । 

रोनाल्डोको योजनाअनुसार युभेन्टसले मार्सेलोलाई भित्र्याउने चाहना गरेको खुलासा भएको छ । रियलमा छँदा रोनाल्डो र मार्सेलो नजिकका साथी थिए । मैदानबाहिर उनीहरूको सम्बन्ध जति सुमधुर थियो, मैदानमा पनि उत्तिकै उत्कष्ट तालमेल थियो । 

रिपोर्टका अनुसार रियलका अध्यक्ष फ्लोरेन्टो पेरेजले पनि मार्सेलोेको युभेन्टस सरुवाका लागि बाटो खोलिदिन तयार देखिएको बताइएको छ ।