नेपाल-युएई सिरिज जित्नेले तीन लाख पाउने

काठमाडौं- नेपाल र संयुक्त अरब इमिरेट्स (युएइ)को क्रिकेट टोलीबीच हुने तीन अन्तर्राष्ट्रिय एक दिवसीय र तीन टि-२० अन्तर्राष्ट्रिय सिरिज जित्नेले तीन लाख १४ हजार पाउने भएको छ । 

युएइ क्रिकेट बोर्डले बुधबार जारी गरेको विज्ञप्तिमा अल नाब्दा इन्स्योरेन्स ब्रोकर्स (एनआइबी)सँग प्रायोजन सम्झौता भएको र विजेता टोलीले १० हजार दिराम (तीन लाख १४ हजार) पाउने जनाएको छ । सम्झौतापछि सिरिजको नाम एएनआइबी च्यालेञ्ज भएको छ । 

एएनआइबी युएइ क्रिकेर्ट बोर्डको आधिकारिक बीमा कम्पनी हो । नेपालले यही माघ ११, १२ र १४ गते एकदिवसीय सिरिज खेल्नेछ । यस्तै माघ १७, १८ र २० मा टी-२० सिरिज खेल्नेछ । 

युएइविरुद्धको सिरिज नेपालका लागि दोस्रो एकदिवसीय अन्तर्राष्ट्रिय सिरिज हुनेछ । आइसिसीबाट एकदिवसीय मान्यता पाएपछि नेपालले नेदरल्याण्डसँग पहिलो एकदिवसीय सिरिज खेलेको थियो जुन सिरिज एक-एकको बराबरीमा सकिएको थियो ।