आज दिनभर वर्षा नरोकिने, ठाउँ ठाउँमा बाक्लो हिमपात

काठमाडौं- अकास्मात मौसम बद्लिएसँगै मंगलबार रातिबाट सुरु भएको वर्षा बुधबार दिनभरी नरोकिने भएको छ । काठमाडौं उपत्यका सहित देशका अधिकांश भागमा वर्षा भएरहेको मौसम पूर्वानुमान महाशाखाले जनाएको छ । 

पश्चिमी वायुको प्रभावले देशैभरी वर्षा भएको महाशाखाले जनाएको छ। देशका मध्य भागका अधिकांश क्षेत्र र पश्चिमका धेरैजसो भागमा साँझसम्मै वर्षा हुने मौसमविद्हरुले बताएका छन् ।

सुदुरपश्चिमबाट सक्रिय भएको पानी पर्ने प्रणाली बिहिबारदेखि पुर्वमा सक्रिय हुने भएको  छ। काठमाडौंसहित देशका मध्य र पश्चिम भेगमा परिरहेको वर्षा बुधबार साँझदेखि रोकिनेछ भने बिहिबार विहानदेखि पुर्वी भेगमा पानी पर्ने मौसमविद् समिर श्रेष्ठले जानकारी दिए ।

काठमाडौंमा बुधबार बिहान ६ बजेसम्मको रेकर्डअनुसार ५.५ मिलिलिटर वर्षा भएको छ। काठमाडौं उपत्यकामा यसवर्षको हिउँद सुरु भइपछि पहिलो पटक यति ठूलो पानी परेको हो । पानी परेसँगै चिसो पनि बढेको छ । 

सुदुरपश्चिम र मध्य क्षेत्रका हिमाली र उच्च पहाडी स्थानहरुमा बाक्लो हिमपात भएको छ । मंगलबारबाट भएको हिमपतको क्रम अझै केहि स्थानमा रोकिएको छैन । पानी रहेपछि फेरि धेरै उच्च पहाडी र हिमाली क्षेत्रमा भारी हिमपात हुन सक्ने मौसमविद्हरुको अनुमान छ ।