एकदिवसिय र टी-२० सिरिज खेल्न राष्ट्रिय टोली युएई प्रस्थान

काठमाडौं- संयुक्त अरब इमिरेट्स (युएई) सँगको एकदिवसिय अन्तर्राष्ट्रिय र टी-२० अन्तर्राष्ट्रिय सिरिज खेल्न नेपाली राष्ट्रिय क्रिकेट टोली मंगलबार युएई प्रस्थान गरेको छ । 

नेपालले युएईसँग तीन एकदिवसिय अन्तर्राष्ट्रिय र तीन टी-२० अन्तर्राष्ट्रिय सिरिज खेल्ने छ । माघ ११ गते आफ्नो पहिलो खेल खेल्दै नेपालले सिरिजको सुरुवात गर्ने छ । 

त्यस्तै दोस्रो खेल माघ १२ र तेस्रो एकदिवसिय माघ १४ गते खेल्ने छ । त्यसैगरी माघ १७ गते टी-२० सिरिजको पहिलो खेल खेल्ने नेपालले माघ १८ दोस्रो र माघ २० गते तेस्रो टी-२० अन्तर्राष्ट्रिय खेल्ने छ । 

युएई टुरका लागि आइतबार नै पारस खड्काको कप्तानीमा १६ सदस्यि टोलीको घोषणा भएको थियो । कप्तान खड्काले युएईमा हुने एकदिवसीय क्रिकेट सिरिज जित्न कोशिश गर्ने बताएका छन् । 

‘खेलाडीमा जोश जाँगर देखिएको छ । पहिलो पटक वान डे सिरिज जित्न कोशिश गर्नेछौ ।’ उनले भने, ‘हामी अब स्तरको क्रिकेट खेल्दैछौ । सिरिज हाम्रा लागि चुनौती समेत हो । हाम्रा सबै खेल रेकर्ड भएर बस्नेछ । सबै रकर्डको अर्थ हुनेछ ।’
त्यस्तै, प्रशिक्षक जगत टमाटाले भने, ‘जुन विश्वासले हामीले नयाँ अनुहार ल्याएका छौ । नेपाली क्रिकेटलाई अगाडी लैजान्छन् भन्ने विस्वास लिएको छु ।’