गुटको स्वार्थले विघटन हुँदै नेविसंघ 

काठमाडौं- मातृ पार्टी नेपाली कांग्रेसमा रहँदै आएको गुट-उपगुटको असर प्रमुख भ्रातृ संगठन नेपाल विद्यार्थी संघमा देखापरेको छ । विद्यार्थी नेताहरू गुट–उपगुटमा लागेर पार्टी नेताहरूको घरदैलो धाउन थालेपछि मुलुकको विद्यार्थी आन्दोलनमा ऐतिहासिक योगदान दिँदै आएको नेविसंघको अस्तित्व यति बेला धरापमा परेको छ ।

नविसंघको अधिवेशन विधानतः प्रत्येक दुई वर्षमा हुनुपर्छ । नेविसंघको ११ औं महाधिवेशन सम्पन्न भएको दुई वर्ष पाँच महिना बितेको छ । तर १२ औं महाधिवेशनको टुंगो नलागेपछि संगठन अस्तव्यस्त बनेको छ । नयाँ नेतृत्व चयनका लागि प्रक्रिया अघि बढ्न नसक्दा मुलुकको भाबी राजनीतिक नेतृत्वमा पुग्ने चाहने विद्यार्थीहरुको सपना सपनामै सीमित हुने देखिएको छ ।

कांग्रेस विधानको धारा ४२ को उपधारा १ च मा नेविसंघको महाधिवेशन प्रत्येक दुई वर्षमा सम्पन्न गर्नुपर्ने र कुनै कारण दुई वर्षमा महाधिवेशन सम्पन्न नभए संघको कार्यसमिति भंग गरी बढीमा तीन महिनाभित्र महाधिवेशन सम्पन्न गर्न तदर्थ समिति गठन गर्नुपर्ने व्यवस्था छ । 

११  औं महाधिवेशन सम्पन्न भएको गत भदौ २ गते दुई वर्ष पूरा भएको थियो । त्यसपछि कांग्रेसले विधानविपरीत संघको कार्यकाल दुईपटक थपिसकेको छ । दोस्रोपटक थपिएको म्याद पनि गत बुधबार सकिएको छ । दोस्रोपटक थपिएको म्याद सकिएपछि कांग्रेस पदाधिकारी बैठकले माघ १० गतेसम्मका लागि म्याद थप गरेका थिए । संघको वर्तमान कार्यसमितिलाई निरन्तरता दिने वा तदर्थ समिति गठन गर्ने भन्ने विषयमा छलफल गर्न आगामी १० गते कांग्रेस बैठक बस्ने कार्यक्रम छ ।

अहिले आएर शीर्ष नेताहरू तदर्थ समितिमा कसलाई ल्याउने भन्ने रस्साकस्सीमा छन् । संगठनमा योगदा दिएका र योग्यलाई भन्दा पनि आफ्नो पोल्टाका व्यक्तिलाई तदर्थ समितिमा ल्याउन नेताहरू सक्रिय छन् । नेता रामचन्द्र पौडेल संघका  अध्यक्ष नैनसिंह महरले १२ औं महाधिवेशन सम्पन्न गर्न नसकेकाले अब मनोजमणि आचार्यलाई तदर्थ समितिको अध्यक्ष बनाउनुपर्ने पक्षमा छन् । महर सभापति देउवा निकट मानिन्छन् । आचार्य एघारौं महाधिवेशनमा महरसँग पराजित भएका थिए ।

त्यस्तै अध्यक्ष आफू निकटका विद्यार्थीले नपाएमा दोस्रो जिम्मेवारी विद्यार्थी नेता मोतीलाल भण्डारीलाई दिनुपर्ने अडान पौडल पक्षको छ । उपसभापति विमलेन्द्र निधि पूर्वमहामन्त्री सरोज थापा वा सहमहामन्त्री प्रेम जोशीमध्ये एकजनालाई तदर्थ समितिको अध्यक्ष तोक्नुपर्ने पक्षमा छन् । अर्का नेता  कृष्ण सिटौलाले महामन्त्री कुन्दनराज काफ्लेलाई नै तदर्थ समितिको अध्यक्ष तोक्नुपर्ने बताउँदै आएका छन् । उनले अध्यक्ष आफू निकट विद्यार्थीले नपाएमा दोस्रो तहमा युवराज पाण्डेलाई अगाडि सारेका छन् । 

कांग्रेस महामन्त्री पूर्णबहादुर खड्का भने नेविसंघ वर्तमान कार्य समितिको फेरि म्याद थपेर महाधिवेशन सम्पन्न गर्ने जिम्मेवारी दिनुपर्ने पक्षमा छन् । म्याद नथप्ने हो भने पूर्वउपाध्यक्ष राजीव ढुंगानालाई तदर्थ समितिको अध्यक्ष बनाउनुपर्ने प्रस्ताव उनको छ ।
 
नेपाली कांग्रेसले आगामी माघ १० गते बस्ने केन्द्रीय कार्य समितिको बैठकमा नेपाल विद्यार्थी संघको विषयमा छलफल तथा निर्णय गर्ने सम्भावना छ ।  सभापति शेरबहादुर देउवाले पार्टीको पदाधिकारी बैठकबाट सहमतिकै आधारमा नेपाल विद्यार्थीको समाधान गर्ने मनस्थितिमा छन् । कांग्रेसका उच्च नेता नै विभिन्न गुट बनाएर आफू अनुकूलका पात्रलाई तदर्थ समितिमा अगाडि सारेपछि  सहमति जुट्न कठिन छ ।