नयाँ मर्यादाक्रममा अख्तियारको आपत्ती

काठमाडौं- नयाँ मर्यादाक्रममा अख्तियार दुरुपयोग अनुसन्धान अयोगले आपत्ती जनाएको छ। अयोगको सोमबार बसेको बैठकले सरकारले हालै परिमार्जन गरेको मर्यादाक्रमका सम्बन्धमा विभिन्न निर्णय गरी आपत्ती जनाएको हो।

सरकारले पछिल्लो समय जारी गरेको राष्ट्रिय जीवनका विभिन्न क्षेत्रमा रहेका व्यक्तिको मर्यादाक्रम निर्धारणप्रति अयोगको ध्यानाकर्षण भएको जनाएको छ।

अयोगका अनुसार संवैधानिक पदाधिकारीले अध्यक्षता गर्नुपर्ने विभिन्न बैठकहरुमा सदस्य रहने पदाधिकारीहरुको मर्यादाक्रम संवैधानिक पदाधिकारीहरुभन्दा माथि रहेको तर संवैधानिक पदाधिकारीहरुको मर्यादाक्रम साविककोभन्दा निकै तल्लो क्रममा रहेको जनाएको छ।

अख्तियारको विज्ञप्तीमा भनिएको छ, 'त्यसबाट आयोगको कार्य सम्पादन प्रक्रिया तथा बैठक सञ्चालनको न्यूनतम् मूल्यमान्यता समेत प्रभावित हुने अवस्था सिर्जना हुन जान्छ।' साथै मनोबलमा समेत असर पर्न जाने हुँदा मर्यादाक्रम निर्धारण गर्दा परम्परा, प्रचलित कानून, पदबाट सम्पादन हुने कार्य र गरिमा समेतलाई आधार मानी संवैधानिक निकायका आयुक्त एंव सदस्याहरुको मर्यादाक्रम साविकको जस्तै राख्ने पर्ने अयोगको भनाइ छ।

साविकमा संवैधानिक प्रमुखहरुको लगत्तैपछि राख्ने गरिएकोमा त्यसैगरी राख्ने गरी मर्यादाक्रम निर्णयको पुनरावलोकन हुन अयोगले सरकारलाई आग्रह गरेको अयोगका प्रवक्ता रामेश्वर दंगालले जानकरी दिएका छन्।