काठमाडौंको तापक्रम ३१ डिग्री नाघ्यो, सबैभन्दा बढी कहाँ ?

काठमाडौं- मनसुन सक्रिय भइसके पनि वर्षा नहुँदा देशभर गर्मी बढेको छ। विशेषगरी तराईमा गर्मीका कारण जनजीवन कष्टकर बनेको छ।

तुलनात्मक रुपमा कम गर्मी हुने काठमाडौंमा समेत निकै गर्मी महसुस भइरहेको छ। गर्मीका कारण दिउँसोको समयमा बाहिर निस्कन सकस परेको छ। 

तराईका कतिपय स्थानको अधिकतम तापक्रम ४० डिग्री सेल्सियस नाघेको छ। काठमाडौंको तापक्रम आज ३१ डिग्री नाघेको छ। सोमबार काठमाडौंको अधिकतम तापक्रम ३१.६ डिग्री सेल्सियस मापन गरिएको मौसम पूर्वानुमान महाशाखाले जनाएको छ। 

महाशाखाले सोमबार सार्वजनिक गरेको देशका २१ स्थानको विवरणमध्ये नेपालगन्जको अधिकतम तापक्रम सबैभन्दा बढी ४१ डिग्री सेल्सियस पुगेको छ। धनगढीको ४०.२, भैरहवाको ४०, दिपायलको ३७.५, सिमराको ३७.५, विराटनगरको ३७, जनकपुरको ३६.८, चन्द्रगढीको ३६.३, वीरेन्द्रनगरको ३६.२ र घोराहीको अधिकतम तापक्रम ३५.९ डिग्री सेल्सियस मापन गरिएको छ।