ट्रकले बसलाई ठक्कर दिँदा तीन जनाको मृत्यु

सर्लाही- पूर्व-पश्चिम राजमार्ग अन्तर्गत बाँके जंगल खण्डमा रोकि राखेको रात्रीबसलाई पछाडिबाट ट्रकले ठक्कर दिँदा ३ जनाको मृत्यु भएको छ।

काठमाडौंबाट ईलाम जाने क्रममा सापट बिग्रेर ईश्वरपुर नगरपालिका-१२ स्थित जंगलखण्डमा रोकिराखेको ना. ४ ख ९७५४ नम्बरको बसलाई बिहान २ बजे ना. ५ ख ७१२९ नम्बरको ट्रकले पछाडीबाट ठक्कर दिएको हो। 

दुर्घटनामा परि ईलाम सुल्बुङ-७ निवासी २७ वर्षीय गोविन्द साउदेन, सुनसरि ईटहरी उपमहानगरपालिका-१६ निबासी ३० वर्षीया विनेता राई र पर्सा वीरगंज उपमहानगरपालिका-१९ निवासी ३५ वर्षीय रहिम मियाँको घटनास्थलमै मृत्यु भएको जिल्ला ट्राफिक प्रहरी कार्यालय नवलपुरका प्रहरी निरीक्षक राजकुमार शाहीले जानकारी दिए। साउदेन र राई बसका यात्रु हुन् भने मियाँ ट्रकका यात्रु हुन्।

उत्रेर बसको पछाडी बसेका यात्रुको तिब्रगतिमा आएको ट्रकले बसलाई ठक्कर दिँदा च्याप्पियर मृत्यु भएको हो । त्यस्तै मियाँ भने ट्रकको चालक भएको अनुमान गरिएको छ। "मियाँ चालक भएको र उनले खँलासीलाई चलाउन दिएको हुनसक्ने प्रारम्भिक अनुमान गरिएको छ", ट्राफिक प्रमुख शाहीले भने, "विस्तृत अनुसन्धान भईरहेको छ।"

दुर्घटनामा परि बसका यात्रु नुवाकोट विदुर नपा-१३ निवासी २७ वर्षीय दावा तामाङ, झापा अर्जुनधारा नपा-६ निवासी ३५ वर्षीय राजेन्द्र खतिवडा र उदयपुर कटारी नपा-१ निवासी २२ वर्षीय दिपक अधिकारी घाईते भएका छन् । खुट्टा भाँच्चियका तामाङको बी एण्ड बी ललितपुर, खतिवडाको विर्तामाेड र अधिकारीको लालबन्दीमा उपचार भईरहेको प्रहरीले जनाएको छ।

मृतक तिनैजनाको शब भने सदरमुकाम मलंगवा स्थित जिल्ला अस्पतालमा राखिएको छ।