आठौँ राष्ट्रिय खेलकूद आयोजना गर्न युद्धस्तरमा नेपालगञ्‍ज

नेपालगञ्ज- पूर्वको विराटनगरमा भएको सातौँ राष्ट्रिय खेलकूद प्रतियोगिताको समापनमा आठौँ राष्ट्रिय खेलकूद प्रतियोगिता नेपालगञ्जमा गर्न सक्ने आँट र साहसका साथ मध्यपश्चिम क्षेत्रीय खेलकूद विकास समिति प्रदेश नं ५ का अध्यक्ष भीम ओलीलगायत नेपालगञ्जका सबै पक्षले झण्डा ग्रहण गरेका थिए । 

तर, सोचे अनुरुप आठौं राष्ट्रिय खेलकुद समयमै गर्न प्रदेश नं ५ अर्थात नेपालगञ्जवासीले सकेनन् । पटक पटक वृहत खेलकुदको मिती सर्दै जानु सम्पुर्ण नेपाली खेलकुद प्रतिको विश्वास घट्दै जानु हो । 

दुई दुई बर्षमा हुने भनिएको वृहत खेलकुद प्रतियोगिता समयमै नहुनुले खेलकुदमा लागेका खेलाडीलाई समेत मार पर्ने गर्दछ । यसै खेलकुदको अस्तव्यस्तले गर्दा कयौ राम्रा खेलाडी खेलै छोडी पलाएन समेत भएका छन् । 

नेपाली खेलकुदमा देखिएको अस्तव्यस्तकै कारण खेलाडीले आफ्नो भविष्य नख्दा विदेश पलाएन हुन बाध्य भएका छन् । प्रतियोगिताको मुखैमा पुग्दा मात्र तात्ने नेपालीको बानिले आठौं खेलकुद सम्म पुग्दा समेत छोडेन । 

पटक पटकको मिती सर्दा बल्ल खेलकूदको भौतिक पूर्वाधार निर्माणमा नेपालगञ्जवासी र मध्यपश्चिम क्षेत्रीय खेलकूद विकास समिति प्रदेश नं ५ युद्धस्तरमा जुटेको छ । ‘आठौँ राष्ट्रिय खेलकूद प्रतियोगितालाई भव्य र सभ्य रूपमा सम्पन्न गर्ने तयारीमा जुटेका छौँ’, अध्यक्ष ओलीले भने । 

नेपालगञ्जमा २०१० सालमा निर्माण गरिएको रङ्गशालालाई भण्डै २५ करोडको लागतमा अहिले अत्याधुनिक बनाइँदैछ । रङ्गशाला क्षेत्रभित्र कभर्डहलको मर्मतसम्भार, नयाँ सुटिङरेन्ज, भारोत्तोलन, पौडीपोखरी, क्रिकेट मैदानलगायत संरचना अहिले आएर कामको चटारो देखाएका छन् । 

प्रतियोगिता गत मङ्सिर २१ गते गर्ने आयोजना गर्ने भनिए पनि समयै भौतिक पूर्वाधार निर्माण नभएको भन्दै सारीयो । अहिले राष्ट्रिय खेलकूद परिषद् (राखेप)ले फागुनको दोस्रो सातादेखि सो प्रतियोगिता आयोजना गर्ने घोषणा गरेको छ । 

अहिले भौतिक पूर्वाधार निर्माणको माक ९० प्रतिशत सम्पन्न भएको र अब तोकिएकै समयमा प्रतियोगिता सञ्चालन हुने अध्यक्ष ओलीले बताए । नेपालगञ्जका खेलप्रेमी, खेल पदाधिकारी, उद्योगपति, व्यापारी, राजनीतिक दलका स्थानीय नेता कार्यकर्ता, स्थानीय जनप्रतिनिधिलगायत आठौँ राष्ट्रिय खेलकूदको व्यग्र प्रतिक्षामा छन् । 

आठौँ  राष्ट्रिय खेलकूद प्रतियोगिताको उद्घाटन र समापन नेपालगञ्ज रङ्गशालामा गरिनेछ भने बाँकेको कोहलपुर र खजुरा, बर्दियाको गुलरिया र ठाकुरद्वारा, दाङको बेलझुण्डी, कपिलवस्तु र रुपन्देहीमा समेत केही खेल हुने अध्यक्ष ओलीले बताए । 

प्रतियोगिताका लागि बर्दिया राष्ट्रिय निकुञ्जको पहिचान झल्किने गरी हात्तीको छावालाई ‘मष्कट’का रुपमा राखिने छ । प्रतियोगितामा ३५ खेलका पाँच हजारभन्दा बढी खेलाडी सहभागी हुने बताइएको छ ।