थ्री स्टार क्लब खप्तड गोल्डकपको फाइनलमा

धनगढी- रुस्लान थ्री स्टार क्लब तेस्रो अन्तर्राष्ट्रिय आमन्त्रित सुदुरपश्चिम खप्तड गोल्ड कपमाको फाईनल प्रवेश गरेको छ । बुधबार धनगढी रंगशालामा भएको खेलमा थ्री स्टरले मेची नेत्रालय काक्करभीट्टा फुटबल ट्रेनिङ सेन्टरलाई २-० ले पराजित गर्दै प्रतियोगिताको फाइनलमा प्रवेश गरेको हो । 

पहिलो हाफ गोलरहित बराबरि भएको खेलको दोश्रो हाफमा थ्री स्टारले दुई गोल गरेको हो । थ्री स्टारका लगि रुपेश केसी र सुनिल बलले एक एक गोल गरे । खेलको ६९ औं मिनेटमा रुपेशको गोलमार्फत थ्री स्टारले सुरुवाती अग्रता लियो । 

रन्जन बिस्टको लङ्ग क्रसमा बुद्ध चेम्जोङको हेडर पासमा रुपेशले सहजै गोल गरेका थिए । त्यसअघि २१ औं मिनेटमा थ्री स्टारका फोडे फोफानाले पेनाल्टी क्षेत्रभित्रबाट गरेको प्रहारले पोस्टको दिशा लिन सकेन । 

५३ औं मिनेटमा थ्री स्टारका रुपेश केसीको भली प्रहार दीप कार्कीले बचाए । अर्कोतर्फ काक्करभिट्टाका एन्जल गुरुङको प्रहार आकाशियो । ८० औं मिनेटमा डि बक्स बाहिर मेचिका बिकास राईले थ्री स्टारका रन्जन बिस्टलाई फउल गरेपछी पाएको फ्री-किकमा सुनिलले सहजै बललाई गोलमा परिणत गरे ।

उत्कृष्ट प्रदर्शन गरेका थ्री स्टारका मिडफिल्डर सुनील बल खेलको म्यान अफ द म्याच भए । उनले १० हजार रुपैयाँ प्राप्त गरे । यस जितसँगै थ्री स्टारले प्रतियोगिताको उपाधि भिडन्तमा आफ्नो स्थान पक्का गरेको छ । फाइनल खेल शनिबार हुनेछ । बिहीबार दोस्रो सेमिफाइनलमा सीएमजी क्लब संकटा र नेपाल पुलिस क्लब खेल्नेछन् ।