खप्तड गोल्डकप : क्यामरुनलाई हराउँदै संकटा सेमिफाइनलमा

धनगढी- संकटा क्लब तेस्रो नेपाल आइस अन्तर्राष्ट्रिय सुदुरपश्चिम खप्तड गोल्डकपको सेमिफाइनलमा प्रवेश गरेको छ । धनागढी रंगशालामा मंगलबार दिउँसो भएको खेलमा क्यामरुनको दाउफिन्स फुटबल क्लबलाई १-० ले पराजित गर्दै संकटा प्रतियोगिताको सेमिफाइनलमा प्रवेश गरेको हो । 

संकटाको जितका लागि खेलको एक मात्र निर्णायक गोल एलोन म्याक्स्वेलले गरे । उनले खेलको दोस्रो मिनेटमा नै गोल गर्दै संकटालाई महत्वपूर्ण जित दिलाए । क्यामरुनका गोलरक्षक अगाडी बडेको अवस्थानमा संकटाका लक्ष्मण रुचालले दिएको थ्रु पासलाई म्याक्स्वेलले सहजै गोलमा परिणत गरेका थिए । 

खेलको १२ औं मिनेटमा लक्ष्मण रुचालले वन भर्सेस वनको स्थितिमा गरेको प्रहार क्यामरुनका गोलरक्षकले बचाए । पहिलो हाफको इन्जुरी समयमा दाउफिन्सका कप्तान ले पेनाल्टी क्षेत्रबाहिरबाट गरेको प्रहारले पोस्टको दिशा लिन सकेन ।

दोस्रो हाफको पाँचौं मिनेटमा क्यामरुनले खेल बराबरी गर्ने मौका गुमायो । गोलरक्षक पोजिसनमा नहुँदा आर्मेलको क्रसमा जुनियरको हेडरले पोस्टको दिशा लिन सकेन । खेलमा उत्कृष्ट प्रदर्शन गरेका संकटाका कप्तान रवि सिलवालले म्यान अफ दि म्याच बन्दै १० हजार रुपैयाँ प्राप्त गरे । 

संकटाले अब बिहिबार हुने सेमिफाइनलमा नेपाल पुलिस क्लबको सामना गर्नेछ । बुधबार हुने पहिलो सेमीफाइनलमा रुस्लान थ्री स्टार क्लब र मेची नेत्रालय काकरभिट्टा फुटबल ट्रेनिङ सेन्टर खेल्नेछन् ।