फूलचोकी डेन्जर जोनबाट १६ जनाको उद्धार

काठमाडौंः ललितपुरको फूलचोकी जंगल क्षेत्रमा फसेका १६ जना विद्यार्थीलाई प्रहरीले उद्धचार गरेको छ । गोदावरीबाट करिब १० किमि माथि फूलचोकीमा घुम्न गएका १२ जना युवक र ४ जना युवती ‘डेन्जर जोन’ फसेका थिए  । उनीहरूलाई प्रहरीले सकुशल उद्धार गरेको हो ।

फूलचोकी घुम्न जाने पर्यटकलाई तोकिएको सडकबाहिर नजान ठाउँठाउँमा सूचना बोर्ड राखिएको छ । त्यस्ता सूचना बेवास्ता गर्दा ती युवा अनकन्टार जंगलमा हराएका थिए। खतराको संकेत लेखिएको बोर्ड र प्रहरीको निर्देशन वेबस्ता गर्दै जंगलमा फसेका उनीहरुलाई  महानगरीय प्रहरी परिसरले ललितपुरले उद्धार गरेको हो । उनीहरू हराएको सूचना आएपछि परिसरबाट सातवटा उद्धार टोली परिचालन भएको थियो । परिसरका एसपी शेखर खनालको कमान्डमा खटिएको टोलीले सबैलाई फूलचोकी जंगलको खोचबाट उद्धार गरेको हो ।

एसपी खनालका अनुसार शनिबार घुम्न गएका उनीहरूले ५ बजेर ४० मिनेटमा आफूहरू हराएको भन्दै कन्ट्रोल नम्बर १०० मा फोन गरेका थिए । उनीहरूलाई उद्धार गरी अभिभावकको जिम्मा लगाइएको छ  ।