न्यु डायमण्ड कप भलिबलको उपाधि एपीएफलाई

काठमाडौं- दोस्रो संस्करणको न्यु डायमण्ड कप खुला राष्ट्रिय महिला भलिबल प्रतियोगिताको उपाधि विभागीय टिम एपीएफले जितेको छ । फाइनल खेलमा आयोजक टोली न्यु डायमण्डलाई ३-१ ले पाजित गर्दै उपाधि जितेको हो । 

खेलको पहिलो सेट २५-१६ ले गुमाएको एपिएफले त्यसपछि लगातार जितेको थियो । दोस्रो सेटमा २५-२१ ले जित निकालेको एपीएफले तेस्रो सेटमा २५-२३ र चौथो सेटमा २५-१८ को जित निकाल्दै च्याम्पियन बन्यो । 

उपाधिसंगै एपीएफले ३ लाख रुपैयाँ प्राप्त गर्यो । उपविजेता न्यु डायमण्डले २ लाख रुपैयाँमा चित्त बुझायो । अर्को विभागीय टिम पुलिसले तेस्रो भयो । ८ टिमको सहभागिता रहेको प्रतियोगिता लिग कम नकआउटका आधारमा खेलाईएको थियो । 

व्यक्तीगत उपाधितर्फ एपीएफकी सरस्वती चौधरीले उत्कृष्ट खेलाडी घाषित हुँदै १५ हजार रुपैयाँ प्राप्त गरिन् । न्यु डायमण्डकी प्रतिभा माली उत्कृष्ट स्पाईकर, न्यु डायमण्डकै सलिना श्रेष्ठ उत्कृष्ट डिफेन्डर, ललिता नाथ उत्कृष्ट क्विकर, अनिषा सुनुवार उत्कृष्ट सेटर र झरना श्रेष्ठ उत्कृष्ट सर्भर घोषित भए । 

एपीएफकी उषा विष्ट उत्कृष्ट ब्लगर चुनिदाँ ज्ञानेन्द्र विष्टले उत्कृष्ट प्रशिक्षकको अवार्ड हात पारे । विधागततर्फको उत्कृष्ट खेलाडीले जनही ५-५ हजार प्राप्त गरे ।