मेस्सी विनाको बार्सिलोना लेभान्टेसँग पराजित

एजेन्सी- कोपा डेल’रेमा कप्तान लियोनल मेस्सी विना मैदान उत्रेको बार्सिलोना पराजित भएको छ ।   शुक्रबार बिहान लेभान्टेको घरेलु मैदानमा भएको अन्तिम १६ को खेलमा मेस्सी विनाको बार्सिलोना लेभान्टेसँग २-१ ले पराजित भएको हो ।

लेभान्टेको जितका लागि इरिक केबाको र बोर्जा मायोरलले एक एक गोल गर्दा यता पाहुना टोलीका लागि फिलिप्पे काउटिन्होले गरेका थिए । घरेलु टोलीलाई खेलको चौथो मिनेटमा नै इरिकले गोल गर्दै सुरुवाती अग्रता दिलाएका थिए । 

उनले रुबेन रोचिनाको पासमा गोल गरेका थिए । त्यसपछि खेलको १८औं मिनेटमा यसै सिजनको सुरुमा रियल मड्रिडबाट गएका बोर्जा मायोरलले गोल गरेपछि पहिलो हाफमा लेभान्टेले बार्सिलोनाविरुद्ध २-० को अग्रता बनाएको थियो । 

तर, दोस्रो हाफमा बार्सिलोनाका काउटिन्होले गोल गर्दै खेलमा फर्किने प्रयास गरेका थिए । उनले ८५ औं मिनेटमा पेनाल्टी मार्फत गोल गर्दै पाहुना टोलीलाई खेलमा फर्काउने प्रयास गरेकाथिए । 

तर, थप गोल गर्न नसक्दा बार्सिलोना घरेलु टोलीसँग २-१ ले पराजित भएको हो । पहिलो लेगमा हारेपछि अब बार्सिलोनामाथि आफ्नो घरमा हुने दोस्रो लेगको खेलबाट नतिजा उल्टाउनुपर्ने हुन्छ । दोस्रो लेगको खेल जनवरी १८ मा बार्सिलोनाको घरमा हुनेछ ।