चोरीको इन्धनसहित रिक्सा चालक पक्राउ

वीरगंज- सडक छेउ  पार्किङ गरी राखिएको टिपरबाट इन्धन चोरी गरी लैजाँदै गरेको अवस्थामा अटो रिक्सासहित चालकलाई प्रहरीले पक्राउ गरेको छ। 

वीरगंज महानगरपालिका वडानम्बर १५ लक्ष्मणवा ढाँट नजिकै पार्किङ गरी राखिएको ना.३ ख.९२४०, ना.४ ख.१७६६ र ना.४ ख २६९४ नं.को टिपरबाट दुई सय लिटर भन्दा बढी डिजेल चोरी गरी ग्यालेनमा राखेर लैजाँदै गरेको अवस्थामा ना१ ह ४०७२ नम्बरको अटो चालकलाई सोधपुछ गर्दा चालकसँगै सवार अर्का व्यक्ति फरार भएपछि चोरी बारे प्रकाशमा आएको हो।

प्रहरीले अटो रिक्सा चालक वीरगंज महानगरपालिका-१५ निवासी जय प्रकाश साहलाई पक्राउ गरेको हो।

यसैबीच प्रहरीले लक्ष्मणवास्थित दिपक एण्ड राहुल इन्टरप्राईजेजमा छापा मारेको छ। नेपाल आयल निगमको गाडीबाट अनधिकृत रुपमा तेल चोरी गरी बेचेको जानकारी पाएपछि प्रहरीले छापा मारेको हो। छापा मार्ने क्रममा पसलका संचालक लालबाबु साह कानु र दिपक साह कानु फरार भएको प्रहरीले दाबी गरेको छ।