बाजुरामा छाउगोठभित्रै जलेर तीन आमाछोराको मृत्यु

धनगढी-  बाजुराको बुढीनन्दा नगरपालिका–९ अंगापानी भुगेचौर गाउँमा छाउपडी गोठमा जलेर तीन आमा छोराको ज्यान गएको छ ।

महिनावारी हुँदा दुई छोरासहित घरसँगै जोडिएको छाउपडी गोठमा सुतेको अवस्थामा ३५ वर्षीया अम्बा बोहोरा र उनका १२ बर्षीय छोरा सुरेस र ९ बर्षीय छोरा रमित बोहोराको ज्यान गएको हो । 

इलाका प्रहरी कार्यालय कोल्टीका प्रमुख प्रहरी नायव निरीक्षक शेरबहादुर कुँवरले दिएको जानकारी अनुसार तीनै आमा छोराको शरिरको केहि भाग जलेको छ । प्रहरीका अनुसार बिहान सासु बिशु बोहोरा बुहारीलाई उठाउन जाँदा तीनै आमा छोरा जलेको अवस्थामा भेटिएका थिए ।

साँघुरो गोठमा राति आगो बालेर सुतेको बेला आगो कपडामा सल्किएको प्रहरीले जानकारी दिएको छ । ‘साघुरो गोठ त्यसैमा ढोका पुरै ढाकेर सुतेकाले धुँवाले निसासिएको जस्तो देखिन्छ’ कुँवरले भने,‘धुँवाले निसासिँदा छटपटिए र आगो लागेको जस्तो देखिन्छ ।’ मृतकका श्रीमान काखी बोहोरा रोजगारीको सिलशिलामा भारतमा रहेको बुझिएको छ । 

जानकारी पाएलगत्तै ईलाका प्रहरी कार्यालय कोल्टीबाट प्रहरी टोलीले घट्नास्ल पुगिसेको छ । मृतकहरु वडा अध्यक्ष खडक बोहोराका भाई बुहारी र छोराहरु रहेको बुझिएको छ । 

छाउपडी कुप्रथा बार्ने प्रचलनका कारणले सुदूरका पहाडी जिल्लामा बर्षेनी थुप्रै महिला बालबालिकाले अकालमै ज्यान गुमाउनु परेको छ । छिमेकी जिल्ला अछाममा मात्रै करिव डेढ दशकको अवधिमा छाउपडी गोठमा ज्यान गुमाउने १४ महिला तथा किशोरी मध्ये आधाजसोको ज्यान जोडोयाममा गोठमा धुँवाले निसासिएर गएको छ । साघुँरो गोठमा हावा छिर्ने कुनै ठाउँ नहुँने र साँघुरो ढोकामा पनि कपडा वा परालले टालेर भित्र आगो बालेर सुत्ने गर्नाले निसासिएर ज्यान गएको प्रहरीले अनुमान गरेको छ ।