सामाखुसीमा माइक्रोको ठक्करबाट एकको मृत्यु, चार घाइते 

काठमाडौं- काठमाडौंको सामाखुसीमा माइक्रोबसको ठक्करबाट एक पैदल यात्रुको मृत्यु भएको छ । बा.१ ज ९७६६ नम्बरको माइक्रोबसको ठक्करबाट चार जना गम्भीर घाइते भएका छन् । 

चक्रपथ हुँदै बौद्ध–जोरपाटी चल्ने माइक्रोले ठक्कर दिँदा धुम्बाराही बस्ने ५५ वर्षीय सीता दाहालको मृत्यु भएको हो । माइक्रोबसले ठक्कर दिँदा गम्भीर घाइते दाहालको उपचारका क्रममा अल नेपाल अस्पताल सामाखुसीमा मृत्यु भएको प्रहरीले जनाएको छ ।

सोमबार राति बाटो काट्ने क्रममा माइक्रोबस ठक्कर दिएको थियो । माइक्रोको ठक्करबाट कोटेश्वर बस्ने सरिता अधिकारी, उनका श्रीमान् सुशील अधिकारी, अल नेपाल अस्पतालमा कार्यरत नर्स सपना राई र लक्ष्मी सापकोटा घाइते भएका छन् ।

घाइतेमध्ये सापकोटाको अवस्था गम्भीर रहेको प्रहरीले जनाएको छ । दुर्घटना गराउने माइक्रोबस र बसका चालक रामेछापका ४० वर्षीय टंकराज कार्कीलाई प्रहरीले नियन्त्रणमा लिएको छ ।