रियल मड्रिडको रियल सोसिडाडसँग लज्जासपद हार 

मड्रिड- आइतबार राति भएको स्पेनिस ला लिगामा रियल मड्रिडले रियल सोसिडाडसँग लज्जासपद हार ब्यहोरेको छ । घरेलु मैदान सान्टियागो बर्नबेउमा सोसिडाडासँग २-० को लज्जासपद हार ब्यहोरेके हो । 

घरेलु मैदानमा १० खेलाडीमा समेटिएको रियलमाथि फाइदा उठाउदै सोसिडाडले पराजित गरेको थियो । खेलको ६१ औं मिनेटमा रियलका लुकास भाक्युजले रातो कार्ड खादै मैदान बाहिरिएका थिए । 

रियललाई पराजित गर्न सोसिडाडका लागि विलिएन जोसे र रुबेन प्राडोले एक एक गोल गरे । सोसिडाडले खेलको तेस्रो मिनेटमा नै घरेलु टोलीविरुद्ध सुरुवाती अग्रता लिएको थियो । 

पाहुना टोलीलाई सुरुवाती अग्रता दिलाउन जोसेले पेनाल्टी मार्फत गोल गरेका थिए । पहिलो हाफमा १-० ले अघि रहेको सोसिडाडका लागि प्राडोले दोस्रो हाफमा थप एक गोल गर्दै जित सुनिश्चित गरेका थिए । 

उनले खेलको ८३ औं मिनेटमा गोल गर्दै टोलीलाई २-० ले जित दिलाए । यस जितसँगै रियल सोसिडाड २२ अंक सहित लिगको १२ औं स्थानमा छ । यता पराजित भएको रियल मड्रिड भने ३० अंक सहित पाँचौ स्थानमा छ । 

त्यस्तै ला लिगामा गय रातिनै भएको अर्को खेलमा सेभिल्ला र एटलेटिको मड्रिडले १-१ को बराबरी खेलेका छन् ।