‘ए’ डिभिजन लिग : सरस्वती र पुलिस भिड्दै

काठमाडौं- सहिद स्मारक ‘ए’ डिभिजन लिगको अन्तिम चरणको खेल शनिबारबाट सुरु हुँदा पहिलो दिन दुई खेल हुँदै छन् । दुबै खेल एपीएफको खेल मैदान हलचोकस्थित हुने छन् । 

पहिलो खेलमा जावलाखेल युथ क्लब र च्यासल युथ क्लबबीच प्रतिस्पर्धा हुने छ । पहिलो पटक ‘ए’ डिभिजन लिग खेलिरहेको च्यासलले अपेक्षा अनुसारको नजिता निकाल्न सकेन । 

घरेलु फुटबलका राम्रा खेलाडी अनुबन्धन गरेर पनि उसले शीर्ष ६ भित्र आफुलाई अटाउन सकेन । जावलाखेलको समेत यसपटकको प्रर्दशन बिर्सन लायक रह्यो । च्यासल १५ अंक सहित तालिकाको आठौं स्थानमा छ । जावलाखेल १२ अंक सहित दशौँ स्थानमा छ ।

त्यस्तै शनिबार नै हुने दोस्रो खेलमा सरस्वती युथ क्लब र नेपाल पुलिस क्लबबीच प्रतिस्पर्धा हुनेछ । तालिकाको नवौँ स्थानमा रहेको सरस्वतीलाई अंक घटुवाको डर छैन । विदेशी खेलाडीको भरमा लिगमा राम्रो नतिजा ल्याउने अपेक्षा क्लबको थियो । 

विभागीय टिम पुलिसका लागि रेलिगेशन विनाको लिग गतिलो रहेन । युवा तथा अनुभवी खेलाडीले भरिएको पुलिसले अपेक्षाकृत नजिता लिगमा निकाल्न सकेन । शीर्ष ६ भित्र ढुक्क हुन उसले सरस्वतीलाई हराउनुपर्नेछ । 

पुलिस १८ अंक सहित तालिकाको छैटौ स्थानमा छ । सरस्वती १३ अंक सहित तालिकाको नवौँ स्थानमा छ ।