फर्नान्डोको ह्याट्रिकले टोटनह्याम एफए कपको चौथो चरणमा 

एजेन्सी- फर्नान्डो लोरेन्टेको ह्याट्रिकको मदतले प्रिमियर लिग क्लब टोटेनह्याम हस्टपर एफए कपको चौथो चरणमा प्रवेश गरेको छ । शुक्रबार राति भएको खेलमा टोटेनह्यामले दोस्रो श्रेणीको ट्रानमेर रोभर्सलाई ७-० को फराकिलो अन्तरले पराजित गर्दै कपको चौथो चरणमा प्रवेश गरेको हो । 

अवे खेलमा टोटेनह्यामलाई जित दिलाउन फर्नान्डो लोरेन्टेले ह्याट्रिक पूरा गर्दा सर्ज औरियरले २ गोल गरे । त्यस्तै ह्युङ मिन सन र ह्यारी केनले समान १-१ गोल गरे ।
टोटनह्याको दबदबा रहेको खेलको पहिलो हाफमा मात्र एक गोल भएको थिए । थप ६ गोल टोटनह्यामले दोस्रो हाफमा गरेको थियो । 

पहिलो हाफ सकिन ५ मिनेट बाँकी रहँदा सर्ज औरियरले गोल गर्दै टोटनह्यामलाई सुरुवाती अग्रता दिलाए । त्यसपछि दोस्रो हाफमा सुरुवात मै फर्नान्डो लोरेन्टे गोल गर्दै अग्रदा दोब्बर बनाए । 

उनले ४८औं मिनेटमा पहिलो गोल गरे । औरियरले ५५औं मिनेटमा गोल गरेपछि टोटेनहमले खेलमा ३-० को अग्रता बनायो । त्यसको दुई मिनेटपछि नै ह्युङ मिन सनले गोल थपेपछि टोटेनहम ४-० ले अघि बढ्यो । 

७१औं र ७२औं मिनेटमा लोरेन्टेले लगातार गोल गर्दै खेलमा ह्याट्रिक पुरा गरे । ८२औं मिनेटमा ह्यारी केनले गोल गरेपछि टोटेनहमले ७-० को फराकिलो जित निकाल्न सफल भयो ।