चितवनमा घट्यो डेंगु संक्रमण

चितवन- जिल्लामा डेंगुको संक्रमण घट्दै गएको छ। यहाँका अस्पतालमा उपचार गर्न आउने बिरामीमध्ये दैनिक आठदेखि १० जनासम्ममा डेंगुको संक्रमण देखिएको जनस्वास्थ्य कार्यालय चितवनले जनाएको छ।

कार्यालयका प्रमुख दिनेश रुपाखेतीका अनुसार डेंगु संक्रमण तीव्र फैलिएको समयमा दैनिक ३० जनामा संक्रमण पुष्टि हुने गरेकामा कात्तिकको अन्तिम सातादेखि यो संख्या घट्दै गएको हो। उनले भने, ‘प्रयोगशालाका अनुसार अहिले आठदेखि १० जनामा मात्र संक्रमण देखिन थालेको छ। यसले संक्रमण दर घट्दै गएको संकेत गर्छ।’

गत वर्ष कात्तिकसम्म मात्रै देखिएको डेंगु अहिले मंसिरमा पनि देखिएकाले सतर्कता अपनाउन प्रमुख रुपाखेतीले सबैलाई आग्रह गरे। उनका अनुसार जिल्लाका विभिन्न अस्पतालमा उपचारका लागि आएका ११ हजार ९१९ जनाको डेंगु परीक्षण गर्दा तीन हजार ६८७ संक्रमण पुष्टि भएको हो।

संक्रमितमध्ये दुई हजार ८४६ जना चितवनका र बाँकी जिल्लाबाहिरका रहेका छन्। रुपाखेतीका अनुसार संक्रमितमध्ये एकजनाको मृत्यु भएको छ। जिल्लामा संक्रमित भएकामध्ये सबैभन्दा बढी भरतपुर महानगरपालिकाका एक हजार १५३ बिरामी रहेका छन्। सबैभन्दा कम माडी नगरपालिकाका ३६ जना छन्।

यो रोग घरवरिपरि बस्ने एडिज जातको पोथी लामखुट्टेको टोकाइबाट सर्ने गर्दछ। यो लामखुट्टेले प्रायः बिहान र बेलुकाको समयमा टोक्ने भएकाले सो समयमा विशेष सावधानी अपनाउनुपर्ने प्रमुख रुपाखेतीले बताए।

यो लामखुट्टेले प्लास्टिक, टिनका डब्बा, ड्रम, थोत्रा वा पुराना टायर, गमला, कुलरमा जम्मा भएको सफा पानी, खुला पानीको ट्यांकी आदिमा फुल पार्ने गर्दछ। यी ठाउँमा जम्मा भएको पानीलाई सफा नगर्दा रोगको संक्रमण बढ्ने जनस्वास्थ्य कार्यालय चितवनका जनस्वास्थ्य अधिकृत विमल पट्टेलले बताए।

डेंगु हुँदा ज्वरो पाँचदेखि सात दिनसम्म रहिरहन सक्छ। यो रोग लाग्दा आँखाको गेडी तथा टाउको धेरै दुख्ने, शरीर दुख्ने, जोर्नी, हड्डी तथा मांसपेशी दुख्ने, शरीरमा बिमिरा आउने र रक्तश्राव हुने, उच्च ज्वरो आउनेजस्ता लक्ष्यण देखा पर्दछन्। त्यस्तै, वाकवाकी लाग्ने, बान्ता हुने, पेट दुख्ने, नाक वा गिजाबाट रगत बग्नेलगायत लक्षण देखापर्ने जनस्वास्थ्य अधिकृत पट्टेलले जानकारी दिए।

डेंगुको ज्वरोबाट बच्ने मुख्य उपाय भनेको लामखुट्टेको टोकाइबाट बच्नु रहेको जनस्वास्थ्य कार्यालय चितवनले जनाएको छ। यस्तै, आफू बस्ने ठाउँवरिपरि फालिएका खाली बट्टा, अलकत्रा वा मट्टीतेलका खाली ड्रम, पुराना टायर आदिमा पानी जम्न नदिने रहेको उनले बताए।