भलिबल खेलाडीलाई विदाइ

जनकपुरधाम- इटहरीमा हुन लागेको दोस्रो सभामुख कप राष्ट्रिय पुरुष भलिबल प्रतियोगिताका लागि प्रदेश २ का खेलाडीहरुलाई प्रदेश २ का सभामुखले बिदाइ गरेका छन्।

१९ देखि २३ पुषसम्म प्रदेश १ को इटहरीमा हुन लागेको सभामुख कप राष्ट्रिय पुरुष भलिबल प्रतियोगिताका लागि प्रदेश २ का सभामुख सरोजकुमार यादवले बुधबार खेलाडीहरुलाई बिदाइ गरेका हुन्।

प्रदेशसभा परिसरमा आयोजित एक कार्यक्रमका बीच सभामुख यादव र उपसभामुख उपमा देवले प्रदेश २ का भलिबल खेलाडीहरुलाई फूलमाला र अबिर लगाइ बिदाइ गरेका छन्।

प्रदेश २ को टोलीमा तीनजना अफिसियलका साथै १२ जना खेलाडी सहभागी रहेको प्रदेश २ मा भलिबलका मुख्य प्रशिक्षक भरत यादवले बताए। खेलकुद मन्त्रालयको सहकार्यमा हुन लागेको भलिबल प्रतियोगितामा सातै प्रदेश र तीन विभागीयसहित १० वटा टिम उपाधिका लागि प्रतिस्पर्धा गर्ने यादवले जानकारी दिए।

प्रदेश २ बाट प्रतिनिधित्व गर्ने भलिबल टोलीमा धनुषा, महोत्तरी, सिरहा, सर्लाहीलगायतका जिल्लाबाट खेलाडी छनौट गरिएको बताइएको छ। प्रतियोगिताको उपाधि जित्ने टोलीलाई पाँच लाख, दोस्रो हुने टिमलाई ३ लाख र तेस्रो हुने टिमलाई १ लाख नगद पुरस्कार दिइने बताइएको छ।