डिपिएल अक्सनका लागि २०५ खेलाडीको नाम दर्ता

धनगढी- तेस्रो संस्करणको धनगढी प्रियिमर लिग (डीपीएल) टी-२० क्रिकेटका लागि २ सय ५ खेलाडीले नाम दर्ता गराएका छन् । आयोजक धनगढी क्रिकेट एकेडेमीले तोकेको समयभित्र २ सय ५ खेलाडीले नाम दर्ता गरेको जनाइएको छ । 

डीपीएल अक्सनका लागि नाम दर्ताको समय पुस ४ गते देखि १७ गते सम्म खुल्ला गरेको थियो । खेलाडी स्वयमले आफ्नो न्युनतम मुल्य सहित प्रतियोगिता खेल्न नाम दर्ता गराएका हुन् । 

आयोजकले खेलाडीलाई न्युनतम ३० हजार देखि अधिकतम २ लाख ५० हजारसम्मको मुल्य राखेर नाम दर्ता गर्न आह्वान गरेको थियो । खेलाडी लिलामी (अक्सन) पुस २२ गते हुने आयोजक संस्थाका अध्यक्ष सुवास शाहीले बताए । 

अक्सनबाट छनोट भएका खेलाडीलाई सहभागि टिमले ३ बर्षका लागि अनुबन्धन गर्नेछन् । खेलाडीको सेवा सुविधा तथा पारिश्रमिक सहभागि टिमसँगको आपसी सहमतीमा निर्धारण गरिने बताईएको छ । 
डिपिएल आगामी माघ २६ देखि फागुन ११ गतेसम्म धनगढीमा सञ्चालन हुनेछ । प्रतियोगितामा ६ फ्रेन्चाईज टोलीले प्रतिस्पर्धा गर्नेछन् ।