ए डिभिजन लिग : संकटा र थ्री स्टारको लक्ष्य दोस्रो स्थान

काठमाडौं-सहिद स्मारक ए डिभिजन लिग अन्तर्गत आज (बुधबार) दुई खेल हुदैछन् । लिगमा १२ औ चरणको अन्तिम खेलहरुमा मनाङले हिमालयन शेर्पा र संकटाले थ्री स्टारसंग खेल्नेछ ।

ललितपुरको सातदोबाटोस्थित एन्फा कम्प्लेक्समा दिउँसो साँढे २ बजे हुने खेलमा संकटाले थ्री स्टारको सामना गर्ने छ । मैदान उत्रदै गर्दा दुवै टोलीको लक्ष्य लिगको उपविजेताका बन्नु रहेको छ । लिगमा समान खेल खेलेको संकटा २५ अंक सहित दोस्रो स्थानमा छ । थ्री स्टार २३ अंक सहित तेस्रो स्थानमा छ । दुबै टोलिको दोस्रो बन्ने लक्ष्य आजको खेलले तय गर्ने छ ।

यस अघि मनाङले दुई खेल अगावै लिग जितेर लिगको रौनकमा कमि दिलाई सकेको छ । अव लिगमा दुई चरणको मात्र खेल बाँकी छन् । थ्री स्टार र संकटा बाकिँ दुई खेलमा जित निकालेर उपविजेता बन्दै प्रतियोगिताको अन्त्य गर्ने योजनामा हुनेछन् । संकटालाई पराजित गर्दै लिगको दोस्रो स्थानमा उक्लिने मौका ललितपुरे क्लब थ्री स्टारलाई प्राप्त छ ।

आजनै हुने अर्को खेलमा मनाङले हिमालयन शेर्पासंग खेल्दैछ । लिगको एघारौ चरणको खेलसम्म शतप्रतिशत जित निकाल्दै उपाधि जितेको मनाङ सोही प्रर्दशनलाई अन्तिम खेलसम्म कायम राख्ने योजनामा हुनेछ । आजको खेलमा जित निकाल्दै शतप्रतिशत जित सहित लिगको अन्त्य गर्ने लक्ष्य मनाङ छ ।
मनाङ ११ खेलबाट ३३ अंक जोड्दै उपाधि सहित शीर्ष स्थानमा राज गरेर बसेको छ । शेर्पा क्लब ११ अंक सहित तालिकाको सातौ स्थानमा छ ।