प्रिमियर लिग :  टोटेनहमलाई दोस्रो स्थानमा उक्लिने मौका

एजेन्सी-इंग्लिश प्रिमियर लिग फुटबलमा मंगलबार तीन खेल हुँदै छन् । नयाँ बर्षको पहिलो दिन प्रिमियर लिगमा टोटेनहम, आर्सनल, लेष्टर सिटी लगायतका ठुला टोलीले प्रतिस्पर्धा गर्दैछन् । 

प्रिमियर लिग अन्तर्गत मंगलबार हुने पहिलो खेलमा एभर्टन र लेष्टर सिटीबीच प्रतिस्पर्धा हुँदैछ । खेल नेपाली समय अनुसार बेलुका ६:१५ मा सुरु हुनेछ । दुबै टोली मैदान उत्रदा लक्ष्य जित निकाल्दै अंक तालिका सुधार गर्ने हुनेछन् । एभर्टन २७ अंक जोडेर लिगको १० औं स्थानमा रहँदा सिटी २८ अंक जोडेको लिगको आठौं स्थानमा छ ।

यस्तै अर्को खेलमा आर्सनलले फुलहमको सामना गर्नेछ । खेल नेपाली समय अनुसार बेलुका ८:४५ मा सुरु हुनेछ । पछिल्ला खेलमा उच्च प्रदर्शन गर्न नसकिरहेको आर्सनल फुलहमलाई हराएर शीर्ष चार टोलीविरुद्ध अंक दुरी घटाउने योजनामा हुनेछन् । 

आर्सनल लिगमा ३८ अंक जोड्दै पाँचौ स्थानमा छ । यता फुलहम १४ अंक जोडेर रेलिगेसन जोनमा रहेको छ । नयाँ बर्षको पहिलो दिनको अन्तिम खेलमा टोटेनहम र कार्डिफ सिटीले प्रतिस्पर्धा गर्नेछन् । कार्डिफको मैदानमा हुने खेल राति ११:१५ मा सुरु हुनेछ ।

कार्डिफविरुद्ध मैदान उत्रदा टोटेनहम जित निकाल्दै लिगको दोस्रो स्थानमा उक्लने दाउमा हुनेछ । तेस्रो स्थानको टोटेनहमले २० खेलबाट ४५ अंक जोडेको छ । कार्डिफलाई हराए टोटेनहमले म्यानचेस्टर सिटीलाई १ अंकले पछि बनाएर दोस्रो स्थान हासिल गर्नेछ । 

सिटीको ४७ अंक छ । यस्तै टोटेनहम शीर्ष स्थानको लिभरपुलसंगको अंक दुरी समेत कम गर्न चाहन्छ । लिभरपुलको ५४ अंक छ ।  कार्डिफ १८ अंक जोडेर १६ औं स्थानमा छ ।