‘ए’ डिभिजन लिग : दुई विभागीय टोली भिड्दै

काठमाडौं- सहिद स्मारक ‘ए’ डिभिजन लिग अन्तर्गत मंगलबार दुई खेल हुदै छन् । एक खेल एन्फा कम्प्लेक्समा हुने छ भने अर्को खेल एपिएफके खेल मैदानमा हुनेछ । दुबै खेल दिउँसो २:३० बजेबाट हुने छन् । 

एन्फा कम्प्लेक्समा हुने खेलमा च्यासल युवा क्लबले सरस्वती युवा क्लबको सामना गर्दैछ । सरस्वतीलाई हराए च्यासलले शीर्ष ६ मा प्रवेश गर्नेछ । त्यस्तै सरस्वती पनि जित दर्ता गर्दै नवौं स्थानमा पुग्ने सुरमा हुनेछ । 

च्यासलले ११ खेलमा ४ जित  र ३ बराबरीसहित १५ अंक जोडेको छ । यता सरस्वतीले ११ खेलमा ३ जित र १ बराबरी खेल्दै १० अंक जोडेको छ । अर्को खेलमा दुई विभागिय टोलीबीच प्रतिस्पर्धा हुँदै छ । 

एपीएफको घरेलु मैदानमा नेपाल पुलिस क्लबको उसको सामना गर्दैछ । पुलिस ११ खेलमा ५ जित र ३ बराबरीको नतिजासाथ् १८ अंक लिएर पाँचौ स्थानमा छ । यस खेल जितेको खण्डमा पुलिसले चौथो स्थानमा आर्मीलाई उछिन्ने आफ्नो सम्भावना बनाउनेछ । 

यता एपीएफ आजको खेलमा जित दर्ता गर्दै पुलिसलाई उछिन्ने सुरमा छ । एपीएफले ११ खेलमा ५ जित र २ बराबरीसँगै १७ अंक जोडेको छ । आफ्नो घरेलु मैदान भएको हुनाले एपीएफ अझ धेरै हौसिएको छ ।