सिटी प्रिमियर लिगको दोस्रो स्थानमा 

एजेन्सी- इंग्लिश प्रिमियर लिग फुटबलमा साबिकको विजेता म्यानचेस्टर सिटी जारी लिगको दोस्रो स्थानमा उक्लेको छ । आइतबार भएको खेलमा सिटीले साउथह्याम्पटनमाथि ३-१ गोलको सहज जित निकाल्दै सिटी अंक तालिकाको दोस्रो स्थानमा उक्लेको हो । 

घरेलुटोलीलाई पराजित गर्न सिटीका डेभिड सिल्भा र सर्जियो अग्युरोले एक एक गोल गर्दा एक गोल भने आत्मघाती उपहार पाएको थियो । साउथह्याम्पटनका जेम्स वार्ड्सले आत्मघाती गोल गर्दा पिएर्रे होज्वजेर्गले एक गोल फर्काए ।

घरेलु टोलीविरुद्ध सिटीले खेलको १० औं मिनेटमा सिल्भाको गोलबाट अग्रता बनाएको थियो । तर, खेलको ३७ औं मिनेटमा साउथह्याम्पटनका पिएर्रेले गोल गर्दै खेल १-१ को बराबरीमा ल्याए ।

पहिलो हाफका अन्तिम मिनेटमा वार्ड्सले आत्मघाती गोल गरेपछि सिटीले पुनः २-१ को अग्रता बनायो । त्यसपछि पहिलो हाफको इन्जुरी समयमा अग्युरोले गोल गरेपछि पहिलो हाफमा सिटीले ३-१ को अग्रता बनायो । दोस्रो हाफमा दुवै टोलीले थप गोल गर्न नसक्दा सिटीले ३-१ को महत्वपूर्ण जित निकाल्यो । 

जितपछि सिटीले २० खेलबाट ४७ अंक जोडेको छ । तर, सिटी शीर्ष स्थानको लिभरपुल भन्दा अझै ७ अंकले पछि छ । लिभरपुलको ५४ अंक छ ।  पराजित साउथह्याम्पटनको १५ अंक छ । अर्को खेलमा बर्नलीले वेष्ट ह्यामलाई २-० ले हराएको छ ।