सुदूरपश्चिम खप्तड गोल्डकपलाई नेपाल आइसको साथ

धनगढी- तेस्रो संस्करणको सुदूरपश्चिम खप्तड गोल्डकपलाई नेपाल आइसले साथ दिने भएको छ । घरेलु फुटबलको सर्वाधिक ठुलो धनराशीको फुटबल प्रतियोगितालाई नेपाल आईसले मुख्य प्रायोजनमा निरन्तरता दिएको हो । 

आयोजक सुदुरपश्चिम ११ स्पोर्ट्स क्लबका अध्यक्ष सुरेश हमाल र सिजीको प्रतिनिधि प्रदीप पुडासैनीले काठमाडौंमा शनिबार एक कार्यक्रमको आयोजना गर्दै सम्झौता पत्रमा हस्ताक्षर गरे । 

सम्झौता पत्रमा हस्ताक्षर गर्दै पुडासैनीले देशकै ठुलो धनराशिको भएको प्रतियोगितालाई प्रायोजन गर्न पाउनु आफैमा एक गौरवको बिषय भएको बताएका छन् । सुदूरपश्चिम जस्तो ठाँउमा देशकै ठुलो धनराशिको फुटबल प्रतियोगिताले हुने सुदूरपश्चिमको विकासमा ठुलो सेवा पुग्ने समेत बताए ।

पुस २४ बाट माघ ५ गतेसम्म संचालन हुने प्रतियोगितामा ए डिभिजन लिगका क्लब सहित भारतको टिमले समेत सहभागिता जनाउनेछ । विभिन्न गरी १२ टिमको सहभागिता रहने भएपनि दुई टोलीको केहि दिनमै टुङ्टो लाग्ने आयोजक हमालले जानकारी दिए । 

नकआउटका आधारमा सञ्चालन हुने प्रतियोगिताको विजेताले २१ लाख र उपविजेताले १० लाख रुपैयाँ प्राप्त गर्नेछ ।