सरस्वतीमाथि आर्मीको फराकिलो जित

काठमाडौं- सहिद स्मारक ‘ए’ डिभिजन लिग फुटबलमा विभागीय टोली आर्मी क्लबले सहज जित निकालेको छ । शुक्रबार भएको खेलमा सरस्वती युथ क्लबलाई ४-० को फराकिलो अन्तरले परमजित गर्दै सहज जित निकालेको हो । 

आर्मीको जितका लागि कप्तान भरत खवासले २ र नवयुग श्रेष्ठले एक गोल गर्दा एक गोल आत्मघाती उपहार पाएको थियो । सरस्वतीविरुद्ध खेलको छैटौं मिनेटमा नवयुगले गोल गर्दै आर्मीलाई सुरुवाती अग्रता दिलाएका थिए । 

उनले दिपक गुरुङको पासमा गोल गर्दै आर्मीलाई सुरुवाती अग्रता दिलाए । खेलको ३० औं मिनेटमा कप्तान भरतले पेनाल्टीमा गोल गर्दै आर्मीको अग्रता दोब्बर बनाए । 

त्यसपछि दोस्रो हाफमा भरतले व्यक्तीगत दोस्रो गोल गर्दै अग्रता तेब्बर पारे । उनले खेलको ६२ औं मिनेटमा हेडमार्फत गोल गरेका तिए । त्यसपछि खेलको ८० औं मिनेटमा एक आत्मघाती गोलको उपहार पाउँदै आर्मीले ४-० को सहज जित निकालेको हो । 

यस जितसँगै आर्मीले ११ खेलबाट २१ अंक जोडेको छ । आर्मी लिगको चौथो स्थानमा छ । १० अंक जोडेको सरस्वती दशौं स्थानमा छ ।