रियलबाटै सन्यास लिन चाहन्छु : मोड्रिच

एजेन्सी– रुस विश्वकप २०१८ को उपविजेता क्रोएसियाका कप्तान लुका मोड्रिचले रियलमा रहरै खेल जीवनबाट सन्यास लिने इच्छा रहेको बताएका छन् । ‘म चाहन्छु की मेरो खेल जीवनको अन्त्य यहि होस् । त्यो मेरो लागि महत्वपूर्ण छ ।’ 

मोड्रिचले भने, ‘मैले माथिल्लो स्तरमा रहेर खेल्नु पर्छ । त्यो आफैंमा सहज छैन ।’ ३३ बर्षीय मोड्रिचले जारी सिजनको सुरुवातमा कमजोर प्रदर्शन गरेका थिए । 

ब्यालोन डी ओर विजेता मोड्रिचको सिजनको सुरुवातमा रियलसँग सम्झौताका विषयमा केहि असन्तुष्ट भएपछि उनी इन्टर मिलान जाने चर्चा पनि चलेको थियो । अहिले आएर भने उनले आफु रियलमा खुसी रहेकोको बताएका छन् । 

विश्व कप फुटबलमा क्रोएसियालाई फाइनल सम्म पुर्याउन महत्वपूर्ण भूमिका निर्वाह गरेका मोड्रिडले व्यक्तिगत उत्कृष्ट यो वर्षका सबै अवार्ड जितिसकेका छन् । मैदान भित्रको व्यस्तताका कारण उनी केहि थकित भएको अनुमान गरिएको थियो । 

पछिल्लो समय भने उनी फेरि लयमा देखिएको विश्वास गरिएको छ । उनी लयमा फर्कदा घरेलु लिग र च्याम्पियन्स लिगमा रियलको चुनौति बलियो हुने अपेक्षा गरिएको छ ।