स्वामित्व हस्तान्तरण नहुँदा ३२ करोड ६० लाख खर्चेर बनाइएको ‘धनगढी सभागृह’ प्रयोगविहीन

कैलाली- धनगढी उपमहानगरपालिका-८ धनगढीगाउँमा निर्माण गरिएको ‘धनगढी सभागृह’ स्वामित्व हस्तान्तरण नहुँदा प्रयोगविहीन बनेको छ।

सहरी विकास मन्त्रालयअन्तर्गत संघीय आयोजना कार्यान्वयन एकाइ धनगढीमार्फत निर्माण गरिएको सो सभागृहको स्वामित्व हस्तान्तरण नहुँदा प्रयोगविहीन भएको हो।

दुई वर्षअगाडि निर्माण सम्पन्न भएको उक्त सभागृहमा सात सय जना क्षमताको एउटा मुख्य हल, दुई सय जना क्षमताको कार्यक्रम कक्ष, एक सय सवारीसाधन अटाउने क्षमताको पार्किङ निर्माण गरिएको आयोजना कार्यान्वयन एकाइका सूचना अधिकारी सौरभ कलौनीले जानकारी दिए। उनका अनुसार संघीय सरकारको ३२ करोड ६० लाख ८१ हजार रुपैयाँको लागतमा सभागृह निर्माण गरिएको हो। 

विसं २०७५ माघदेखि निर्माण सुरु भएको सभागृह २०७९ असारमा निर्माण सम्पन्न भएको थियो। निर्माण कम्पनी ‘विकेओआई एमके रोयल’ जेभीले सभागृह निर्माण गरेको आयोजना कार्यान्वयन एकाइका सूचना अधिकारी  कलौनीले बताए। धनगढी उपमहानगरले उपलब्ध गराएको एक बिघा जग्गामा निर्माण भएको उक्त सभागृहमा रङरोगन, विद्युत् जडानलगायत काम भइसकेका छन्। 

'निर्माण सम्पन्नपछि धनगढी उपमहानगरपालिकालाई हस्तान्तरण गर्ने तयारी थियो', सूचना अधिकारी कलौनीले भने, 'उपमहानगरले फर्निचर तथा साउण्डसिस्टम जडान नभएको भन्दै बुझ्न मानेन। त्यसैले अहिलेसम्म हस्तान्तरण हुनसकेको छैन।'

'साउण्डसिस्टम जडानका लागि हामीले पटक-पटक संघीय सरकारलाई बजेट माग गर्दा पनि सुनावाइ भएन', उनले भने, 'अहिले १५ लाख बजेट आएको छ। त्यसले पुग्दैन। साउण्डसिस्टम जडानका लागि न्यूनतम ८० लाखदेखि एक करोडको हाराहारीमा बजेट आवश्यक पर्छ।'

धनगढीमा हुने सभा, गोष्ठी, बैठक सेमिनारजस्ता ठूला कार्यक्रम गर्ने उद्देश्यले बनेको उक्त सभागृह सञ्चालनमा आउन नसक्दा सरकारी कार्यालयले त्यस्ता कार्यक्रम होटल, पार्टीप्यालेसमा महँगो भाडा तिरेर सञ्चालन गरिरहेका छन्। रासस