प्रिमियर लिगमा आज शीर्ष स्थानका ९ खेल हुँदै, कसको प्रतिद्वन्द्वी को ?

एजेन्सी- इंग्लिस प्रिमियर लिग फुटबलमा बुधबार राति ९ खेल हुँदैछन् । उक्त खेलमा लिभरपुल, म्यानचेस्टर सिटी, चेल्सी, टोटेनहम, आर्सनल, म्यानचेस्टर युनाइटेड लगायतका शीर्ष क्लबले प्रतिस्पर्धा गर्दैछन् ।

बुधबार बेलुका ६:१५ बजे फुलहाम र वोल्भस्बीचको खेल हुँदै छ । त्यसपछि नेपाली समय अनुसार ८:४५ बजे प्रिमियर लिगका ५ खेल हुँदै छन् । जसमा शीर्ष स्थानको लिभरपुलले १५ औं स्थानको न्युकासल युनाइटेडसँग घरेलु मैदानमा खेल्दैछ । 

न्युकासलविरुद्ध मैदान उत्रदा लिभरपुललाई शीर्ष स्थानको अग्रता कायम राख्ने अवसर हुनेछ । न्युकासललाई हराए लिभरपुलले आफ्नो ४ अंकको अग्रता यथावत राख्नेछ । यस्तै सोहि समय दोस्रो स्थानको म्यानचेस्टर सिटीले लेष्टर सिटीसँग खेल्दैछ । 

सिटी लेष्टरलाई हराएर शीर्ष स्थानको लिभरपुलसँग अंक दुरी कम गर्ने लक्ष्यमा हुनेछ । यता, लेष्टर सिटीलाई रोक्दै अंक तालिका सुधार गर्ने योजनामा हुनेछ । नवौं स्थानमा रहेको लेष्टरको २५ अंक छ । 

लिगको तेस्रो स्थानमा रहेको टोटेनहमले बर्नेमाउथसँग वेम्बली स्टेडियममा खेल्नेछ । ४२ अंक जोडेको टोटेनहम जित निकाल्दै लिभरपुल र म्यानचेस्टर सिटीविरुद्ध दबाब बढाउँन चाहन्छ । 

त्यस्तै राति ११ बजे आर्सनलले ब्राइटनसँग प्रतिस्पर्धा गर्दैछ । पाँचौ स्थानको आर्सनल ब्राइटनलाई हराएर चौथो स्थानमा उक्लन चाहन्छ । प्रशिक्षक ओले गुनर सोल्सायरको प्रशिक्षणमा म्यानचेस्टर युनाइटेडले हडर्सफिल्ड टाउनसँग घरेलु मैदानमा प्रतिस्पर्धा गर्नेछ । 

जुन खेल सोल्सायरको दोस्रो खेल हुनेछ । हडर्सफिल्डविरुद्ध युनाइटेड जित निकाल्दै लिगको शीर्ष पाँच टोलीसंग अंक दुरी कम गर्ने लक्ष्यमा हुनेछ । लिगको छैटौं स्थानमा रहेको युनाइटेडको २९ अंक छ । युनाइटेड आफ्नो खराब लएलाई सुधार गर्न चाहन्छ । 

चेल्सीले वाट्फोर्डसँग उसैको मैदानमा खेल्दैछ । चेल्सी र वाट्फोर्डबीचको खेल राति १:१५ मा सुरु हुनेछ । वाट्फोर्डलाई हराएमा चेल्सीले शीर्षस्थानको क्लबसँगको अंक दुरी कम गर्नेछ । चौथो स्थानको चेल्सीको ३७ अंक छ ।