पाक पूर्वप्रधानमन्त्री सरिफलाई सात वर्ष कैद

काठमाडौं- पकिस्तानका पूर्वप्रधानमन्त्री नवाज सरिफलाई भ्रष्टाचार मुद्दामा सात वर्ष कैद सजाय सुनाइएको छ। अल अजिजिया स्टिल मिल्स भ्रष्टाचार प्रकरणमा भ्रष्टाचारविरोधी अदालत (नेसनल अकाउन्टाबिलिटी ब्युरो) ले उनलाई २५ लाख डलर जरिबानासहित सात वर्ष कैद सुनाएको हो।

सरिफलाई अदालतबाटै पक्राउ गरिएको छ। पाकिस्तानको सर्वोच्च अदालतले उनलाई भ्रष्टाचारी ठहर गरेर प्रधानमन्त्री पदबाट बर्खास्त गरेको थियो। उक्त फैसला आउनुभन्दा पहिले अदालत परिसरमा सरिफ समर्थकले हुलदंगासमेत गरेका थिए।

प्रहरीले भीड नियन्त्रणका लागि अश्रुग्यास प्रहार गरेको थियो। भ्रष्टाचार निरोधी अदालत अकाउन्टाबिलिटी  ब्युरोका न्यायाधीश मोहम्मद अरसद मलिकको इजलासले यस्तो फैसला सुनाएको हो। फैसला सुन्न उनी आइतबार नै इस्लामाबाद पुगेका थिए।