लिगमा अपराजित रहँदै मनाङको उपाधि जित्ने सम्भावना बलियो

काठमाडौं- सहिद स्मारक ‘ए’ डिभिजन लिग फुटबलमा मनाङ मस्र्याङ्दी क्लब लिगको दशौं चरणको खेलमा पनि अपराजित रहेको छ । लिगको दशौं खेलमा विभागीय टिम नेपाल पुलिस क्लबलाई १-० ले पराजित गर्दै लगातार जित निकालेको हो । 

मनाङ लिगका सबै खेलमा जित निकाल्दै अपराजित रहेको एक्लो टोली हो । पहिलो हाफ गोलरहित बराबरी भएको खेलमा गोल दोस्रो हाफमा भएको थियो । उक्त खेलको एक मात्र निर्णायक गोल मनाङका विदेशी खेलाडी आडेलाजा सोमिडेले गरेका थिए ।

उनले खेलको ५३ औं मिनेटमा गोल गर्दै मनाङको जितलाई मायमै राख्न मद्दत गरे । सोमिडेले हेमन गुरुङको पासमा गोल गरेका थिए । जितसँगै मनाङले लिगको उपाधि जित्ने सम्भावना बलियो बनाएको छ । 

लिगको तीन खेल बाँकी रहदा मनाङले १० खेलबाट अपराजित रहदै ३० अंक जोडेको छ । शीर्ष स्थानको मनाङ दोस्रो स्थानको संकटा भन्दा ५ अंकले अघि छ । संकटाको १० खेलबाट २५ अंक छ । 

अब मनाङले संकटाविरुद्धको खेल जिते उपाधि आफ्नो बनाउनेछ । मनाङ र संकटाबीचको खेल पुस १२ गते हुनेछ । मनाङसँग पराजित पुलिस १५ अंक छ ।