सरस्वतीलाई हराउँदै लिगमा मछिन्द्रको पहिलो जित

काठमाडौं- सहिद स्मारक ‘ए’ डिभिजन लिग अन्तर्गत मछिन्द्र फुटबल क्लबले आफ्नो पहिलो जित निकालेको छ । ललितपुरस्थित एन्फा कम्प्लेक्समा भएको खेलमा सरस्वती युथ क्लबलाई ४-२ ले पराजित गर्दै लिगमभ पहिलो जित निकालेको हो । 

निकै रोमान्चक बनेको खेलमाको पहिलो हाफमा ५ गोल भएका थिए । पहिलो हाफमा सरस्वतीविरुद्ध मछिन्द्रले ३-२ को अग्रताच लिएको थियो । दोस्रो हाफमा थप एक गोल गर्दै मछिन्द्रले सरस्वतीलाई ४-२ ले पराजित गरेको हो । 

खेलको चौथो मिनेटमा मछिन्द्रका संजय राजबहाकको आत्माघाती गोलबाट सरस्वतीले अग्रता बनाएको थियो । उनले कर्नर बल क्लियर गर्नेक्रममा दोस्रो बार हुँदै आफ्नै पोस्टमा गोल हुन पुगेको थियो । 

तर, खेलको १८ औं मिनेटमा मछिन्द्रका बिशाल राईले बराबरी गोल गरे । खेलको २३ औं मिनेटमा डियामान्डेले गोल गर्दै मछिन्द्रलाई २-१ को अग्रता दिलाए । खेलको २५ औं मिनेटमा अनिल गुरुङले गोल गर्दै मछिन्द्रको अग्रता ३-१ को बनाए । 

त्यसपछि खेलको ३७ औं मिनेटमा सरस्वतीका विदेशी खेलाडी फ्रान्सिसले काउण्टर अट्याकमा गोल गर्दै खेल ३-२ को स्थितिमा ल्याए । दोस्रो हाफमा मछिन्द्रका बिकाश राइले गोल गर्दै टोलीको जित सुनिश्चित गरे । 

उनले खेलको इन्जुरी समयमा गोल गरेका थिए । यसजितसँगै मछिन्दै्रले अंक तालिकामा सुधार गरेको छ । १० खेल खेल्दा मछिन्द्र १ मा जित, ३ बराबरी र ६ खेलमा हार सहित ६ अंक जोडेका छ भने सरस्वतीले समान १० खेलमा ३ खेलमा जित, १ बराबरी र ६ खेलमा हार सहित १० अंक जोडेको छ ।