मेस्सी उत्कृष्ट हैनन् भन्नेले फुटबलै बुझेका छैनन् : ला लिगा अध्यक्ष टेबास

एजेन्सी- अर्जेन्टिनी तथा स्पेनिस क्लब बार्सिलोनाका फरवार्ड लियोनल मेस्सीको खेल क्षमता र उत्कृष्टतालाई लिएर स्पेनिस ला लिगाका अध्यक्ष जाभियर टेबासले मुख खोलेका छन् । 

एक अन्तवार्तामा बोल्दै टेबासले मेस्सी विश्वकै उत्कृष्ट खेलाडी रहेको र उनको तुलना अन्य कोहीसँग पनि हुन नसक्ने बताएका छन् । त्यतीमात्र हैन टेबासले मेस्सी उत्कृष्ट खेलाडी हैनन् भनेर कसैले भन्छ भने त्यो व्यक्तीले फुटबल नै बुझेको छैन ।

‘मेरो विचारमा यदि कसैले मेस्सी संसारकै उत्कृष्ट खेलाडी होइनन् भन्ने अडान लिन्छ भने सम्झनुस्, उसलाई फुटबलको ज्ञान नै छैन’ टेबासले भने । सोहि अन्तरवार्तामा उनले रोनाल्डोको बहिर्गमनले ला लिगालाई कुनै घाटा नभएको समेत बताए । 

टेबासले भने, ‘रोनाल्डो नहुँदा रियललाई समस्या भयो होला । तर, ला लिगालाई कुनै फरक पर्दैन ।’ उनका अनुसार रोनाल्डोभन्दा मेस्सी उच्चस्तरका खेलाडी हुन् ।

टेबासले लेभान्टेविरुद्धको खेलको उदाहरण दिँदै मेस्सी साँच्चै उत्कृष्ट खेलाडी रहेको बताए । ‘यदि तपाईंले लेभान्टेविरुद्धको बार्सिलोनाको खेल हेर्नुभयो भने अवश्य पनि तपाईंले मेस्सी को हुन् भनेर चिन्नुभयो होला ।’