बेलको ह्याट्रिकले रियल क्लब विश्वकपको फाइनलमा 

एजेन्सी- युरोपेली च्याम्पियन रियल म्याड्रिड जापानी क्लब काशीमा एन्टलर्सलाई पराजित गर्दै क्लब विश्वकपको फाइनलमा प्रवेश गरेको छ । बुधबार राति युएईमा भएको खेलमा रियलले काशीमालाई ३-१ ले पराजित गर्दै क्लब विश्वकपको फाइनलमा प्रवेश गरेको हो । 

रियलको जितका लागि फरवार्ड ग्यारेथ बेलले ह्याट्रिक गरेपछि रियलकोक जित सम्भव भएको थियो । रियलले पहिलो हाफमा काशीमाविरुद्ध पहिलो हाफमा १-० को अग्रता लिएको थियो । भने दोस्रो हाफमा बेलले नै पथ दुई गोल गरेका थिए । 

पहिलो हाफमा अन्तिम मिनेटमा बेलले गोल गर्दै रियललाई सुरुवाती अग्रता दिलाएका थिए । दोस्रो हाफको सुरुवातमै दुई गोल थप्दै बेलले ह्याट्रिक पूरा गरे । ५३ औं मिनेटमा अग्रता दोब्बर पारेका बेलले दुई मिनेटमै ह्याट्रिक प्रहार गरे । 

काशीमाका लागि शोमा डोईले ७८ औं मिनेटमा गोल फर्काएपनि उक्त गोल सान्त्वनामा नै सिमित भयो । रियलले अब फाइनलमा युएईको स्थानीय क्लब अल आइनको सामना गर्नेछ । 

अल आइनले रिभर प्लेटलाई पेनाल्टीमा पराजित गर्दै फाइनलमा स्थान पक्का गरेको हो । रियल लगातार तेस्रो पटक क्लब विश्वकपको फाइनलमा प्रवेश गरेको हो । शनिबार हुने फाइनलमा विजयी भए रियलले उपाधिमा ह्याट्रिक गर्नेछ ।