थ्री स्टारले आर्मीसँग बराबरी खेल्यो

काठमाडौं- सहिद स्मारक ‘ए’ डिभिजन लिग अन्तर्गत बुधबार रुस्लान थ्री स्टार क्लबले त्रिभुवन आर्मीसँग १-१ को बराबरीमा खेलेको छ । सातदोबाटोस्थित एन्फा कम्प्लेक्समा भएको खेलमा थ्री स्टारका लागि निराजन खड्काले गोल गरेका थिए भने आर्मीका जर्जप्रिन्स कार्कीले गोल गरेका थिए ।

खेलको पहिलो गोलरहित बराबरीमा सकिएको खेलको दोस्रो हाफमा दुबै गोल सम्भव भएका थिए । पहिलो हाफमा दुबै टोलीले निकै नै आक्रमक खेलेका थिए । दुबै टोलीले पहिलो हाफमा सृजना गरेका केहि अवसरहरुको सदुपयो गर्न नसक्दा खेल पहिलो हाफ गोल रहित बराबरीमा सकिएको थियो । 

खेलमा सुरुवाती अग्रता भने थ्री स्टारले लिएको थियो । थ्री स्टारले खेलको ७० औं मिनेटमा निराजनको गोलमार्फत अग्रता लियो । पिटर सेगुनको पासमा अजायी मार्टिन्सले पेनाल्टी क्षेत्रभित्र दिएको पासमा निराजन खड्काले हाफ भलीमा गोल गर्दै अग्रता दिलाए । 

त्यसपछि आर्मीका जर्जप्रिन्स कार्कीले इन्ज्युरी समयको चौथो मिनेटमा गोल गर्दै खेललाई बराबरीमा ल्याए ।

यस बराबरीसँगै थ्री स्टार अंक तालिकाको तेस्रो स्थानमा अडिएको छ । थ्री स्टारले ९ खेलमा ८ जित, १ बराबर र १ हारसहित २२ अंक जोडेको छ । संकटा २४ अंक जोड्दै दोस्रो स्थानमा छ । 

मनाङ ९ खेलमा २७ अंकसहित शीर्षस्थानमा छ । आर्मी भने ९ खेलमा ५ जित, ३ बराबर र १ हारसहित १८ अंक बोकेर चौथो स्थानमा छ ।