अनन्त लिग खेल्न किन वञ्चित भए ?

काठमाडौं- राष्ट्रिय टोलीका डिफेन्डर अनन्त तामाङ जारी शहीद स्मारक ‘ए’ डिभिजन लिगका खेलहरु आधा सकिदा सम्म पनि उनी लिगको मैदानमा देखिएका छैनन् । 

लिग शुरु भएको अढाई महीनाभन्दा लामो समय बित्दा पनि एउटा राष्ट्रिय टोलीको महत्वपूर्ण खेलाडीले लिग खेल्न नपाउनु दुःखको विषय हो । पछिल्लो समय अनन्त राष्ट्रिय टोलीमा नियमित खेलिरहेका छन् । 

नेपालको रक्षापङ्तिमा उनको प्रदर्शनले नै निर्णायक भूमिका खेल्दै आएको छ । युवा उमेरमा नै उनले आफूलाई राष्ट्रिय टोलीको खम्बाका रुपमा स्थापित गरेका छन् । तर पनि उनले जारी शहीद स्मारक ‘ए’ डिभिजन लिगका खेल खेल्न पाएका छैनन् । 

उनले लिग खेल्न नपाउनुले उनलाई मात्र हैन नेपाली राष्ट्रय फुटबल टोलीलाई समेत असर पर्ने देखिन्छ । यो कुरा एन्फा, क्लब र फुटबल विकाशसँग सरोकार पक्षले ध्यान दिन जरुरी छ । 

अन्नतले लिग सुरुहुनु भन्दा पहिला नै दुई ठूला क्लबबाट सम्झौता गरेको खेलेको छ । उनले दुई ठूला क्लबबाट सम्झौता गरेपछि अन्नत लिग खेल्नबाट वञ्चित भएका हुन् । 

जारी लिगमा नवौँ चरणका खेल सकिँदासम्म अनन्तले कुनै क्लबबाट सहभागिता जनाउन पाएका छैनन् । नेपालका दुई चर्चित क्लब मनाङ-मस्र्याङ्दी र थ्री स्टार क्लबबाट सम्झौता गरेका कारण अनन्त अहिले आफै खेल्नबाट वञ्चित भएका हुन् । 

यिनै दुई क्लब अहिले उपाधि होडमा छन् । दुवै टोलीले अनन्तले आफ्नो क्लबबाट सम्झौता गरेको दाबी प्रस्तुत गरेपछि उनी लिग खेल्नबाट वञ्चित भएका हुन् । अनन्तले गत वर्ष भने थ्री स्टारबाट मोफसलका प्रतियोगिता खेलेका थिए । तर गत वर्ष लिग फुटबल हुन सकेन । 

थ्री स्टारसँगको लिगका लागि सम्झौता हुँदाहुँदै उनले यस वर्ष लिगका लागि मनाङमा सम्झौता गरेपछि विवाद शुरु भएको थियो । एउटा खेलाडीले दुई वटा क्लबबाट सम्झौता गरेमा एक वर्षसम्म खेल्न नपाउने गरी कारवाही गर्ने एन्फाको प्रतियोगिता नियमावलीमा छ । 

एन्फा प्रवक्ता किरण राईले दुई क्लबले अनन्तसँगको सम्झौता प्रस्तुत गरेपछि अप्ठ्यारो परेको बताए । ‘अनन्तले नै केही कमजोरी गरेकाले लिग खेल्न पाएनन् । समस्याको समाधानका लागि हामी प्रयार छौँ ।’ 

राईले भने ‘औपचारिक रुपमा क्लबबाट वा खेलाडीबाट एन्फामा निवेदन परेको छैन, समस्या आइसकेपछि हामीले नै दुई क्लबलाई आन्तरिकरुपमा मिल्न भन्यौँ । तर, त्यस्तो सहमति हुन सकेन । यस्तो अवस्था रहे उनले यस वर्षको लिग खेल्ने सम्भावना कम छ ।’ 

कुनै पनि क्लबले नयाँ खेलाडी अनुबन्ध गर्दा पुरानो क्लबको रिलिज लेटर (फुकुवा गरेको प्रमाणपत्र) चाहिने गर्छ । मनाङले भने उक्त प्रमाणपत्रबिनै अनन्तलाई यस वर्ष अनुबन्ध गरेको थियो । 

दुवै क्लब उपाधि होडमा रहेकाले पनि उत्कृष्ट खेलाडीलाई आफ्नो क्लबबाट खेलाउन चाहन्छन् । आफ्नो क्लबबाट खेलाउन नपाए खेल्नै नदिने दुवै क्लबको रणनीतिले उनको खेल जिवनको कस्तो असर पर्ला त्यो भने दुबै क्लबले बुझ्न जरुरी छ ।