‘ए’ डिभिजन लिग : मनाङको अपराजित यात्रा च्यासलले रोक्ला ?

काटमाडौं- सहिद स्मारक ‘ए’ डिभिजन लिग अन्तर्गत मंगलबार दुई खेल हुँदै छन् । पहिलो खेलमा एपिएफ क्लब र मछिन्द्रबीच प्रतिस्पर्धा हुँदैछ भने दोस्रो खेलमा मनाङ मस्र्याङदी क्लब र च्यासल युवा क्लब खेल्दैछन् । 

खेल सातदोबाटोस्थित एन्फा कम्प्लेक्समा हुने बिहान ११ बजे र दिउँसो २ः३० बजे हुनेछ । पहिलो खेलमा एपिएफ लिगको अंक तालिकाको पुछारमा रहेको मछिन्द्रलाई पराजित गर्दै आफ्नो अंक तालिकामा सुधार गर्न चाहन्छ । 

एपिएफले ८ खेल खेलीसक्दा तीन खेलमा मात्र जित निकालेको छ । उसले १ खेल बराबरी खेल्दा ४ खेल गुमाउँदै १० अंक जोडेर लिगको साँतौं स्थानमा छ । यता मछिन्द्रले भने अकिहे सम्म कुनै जित निकालेको छैन् । मछिन्द्र आजको खेलमा पहिलो जितको खोजीमा हुनेछ । मछिन्द्रले समान ८ खेलमा ३ बराबरी र ५ खेलमा पराजय भोग्दै १३ औं स्थानमा छ ।  

आजको दोस्रो खेलमा मनाङलाई दोस्रो स्थानसँग ३ अंकको अग्रता कायम गर्ने अवसर छ । लिगको आठ खेलमा शत प्रतिशत जित दर्ता गर्दै मनाङ २४ अंक जोड्न सफल भएको छ । उपकप्तान तथा विंगर सुजल श्रेष्ठ घाइते हुनुका बाबजुद पनि मनाङले कुनै अंक गुमाएको छैन । 

अन्जन विष्ट, विशाल राई र गोलरक्षक विशाल श्रेष्ठको लगातार राम्रो प्रदर्शनमा मनाङले अपराजित यात्रा कायम राखेको हो । यसक्रममा मनाङले उपाधिको दुई बलिया दावेदार रुस्लान थ्री स्टार र त्रिभुवन आर्मी क्लबलाई पनि पराजित गरिसकेको छ ।

यता च्यासलले लिगको सुरुवात फितलो गरेपनि पछिल्लो समय सुखद नतिजा आत्मसात गरेको छ । पछिल्लो खेलमा रातो कार्ड खाएका कारण च्यासलका मुख्य फरवार्ड सन्तोष साहुखल यस खेलका लागि उपलब्ध हुने छैनन् । 

च्यासललाई यस खेल जित्दै अंक तालिकाको पाँचौ स्थानमा उक्लने अवसर पनि छ । लिगको ८ खेलमा चसलले ४ जित, १ बराबरी र ३ हारसँगै १३ अंक जोडेको छ ।