इपीएल : काठमाडौं र ललितपुरको लक्ष्य फाइनल

काठमाडौं- एभरेष्ट प्रिमियर लिग (इपीएल) टी-२० क्रिकेटमा मंगलबार क्वालिफायर खेल हुँदैछ । त्रिवि क्रिकेट मैदानमा हुने क्वालिफायरमा ललितपुर प्याट्रीयट्स र काठमाडौं किग्स इलाभेनबीच प्रतिस्पर्धा हुन लागेको हो । खेल दिउँसो एक बजेबाट सुरु हुने छ । 

यि दुई टोलीबीचको खेल जस्ले जित्छ त्यो टोली सोझै फइनल प्रवेश गर्नेछ । त्यसैले पनि ज्ञानेन्द्र मल्ल्को कप्तानीमा रहेको ललितपुर र रोहन मुस्तफाको नेतृत्वमा काठमाडौं मैदान उत्रिदा दुबै टोलीको लक्ष्य सोझै फाइनल पुग्नेछ । 

पराजित हुने टोली भैरहवा र चितवनबीचको एलिनेमिटर खेलमा विजेतासँग पुन अर्को क्वालिफायर खेल खेल्ने छ । यसअघि समूह चरणको खेलमा ललितपुरले काठमाडौंलाई १० विकेटको फराकिलो अन्तरले पराजित गरेको थियो । उक्त खेलमा मुस्तफा र सोमपालको अनुपस्थिति थिए । त्यती बेला काठमाडौंको कप्तानी केभीन ओ’ब्राएनले सम्हालेका थिए ।

त्यसैले यो खेलमा काठमाडौं समुह चरणको हारको बदला लिन चाहन्छ भने बलियो मनोबलमा रहेको ललितपुर समुह चरणको नतिजा पुन आत्मासात गर्न चाहन्छ । पहिलो खेलमा विराटनगरसँग ३ विकेटले पराजित भएको ललितपुर, दोस्रो खेलमा चितवन टाइगर्सलाई ११ रन, तेस्रो खेलमा पोखरा राइनोजलाई ८ विकेट र चौथो खेलमा काठमाडौंलाई १० विकेटको पराजित गर्दा पाँचौ खेलमा भैरहवालाई ६ विकेटले पराजित गर्दै शीर्षस्थानमा रहेर क्वालिफायर खेलेको हो । 

यता काठमाडौंले पहिलो खेलमा चितवनलाई ६ विकेटले पराजित गर्दै विजयी सुरुवात गरे पनि दोस्रो खेलमा भने ललितपुरसँग १० विकेटले पराजित भएको थियो । तेस्रो खेलमा पोखरालाई ५ विकेट, चौथो खेलमा भैरहवा ग्ल्याडीयटर्सलाई ७ विकेट र पाँचौ खेलमा विराटनगर वारीयर्सलाई ५ विकेटले पराजित गर्दै काठमाडौं दोस्रो स्थानमा रहेर क्वालिफायरमा ललितपुरसँगको भेट पक्का गरेको हो ।