आज ला लिगामा ५ खेल हुँदै, बार्साले अंक दुरी बढाउला ?

एजेन्सी- स्पेनिस ला लिगा फुटबलमा आइतबार राति पाँच खेल हुँदै छन् । जसमा एक निकै नै रोमाञ्चक खेल हुँदैछ । लिगको शिर्षस्थानमा रहेको बार्सिलोनाले साँतौंस्थानमा रहेको लेभान्टेसँग खेल्दै छ । खेल नेपाली समयअनुसार आज राति १:३० बजेबाट सुरु हुँदैछ ।

आजको खेल जिते बार्सिलोनाले लिगमा तीन अंकको अग्रता बनाउने छ । किनकी शनिबार भएको खेलमा एटलेटिको मड्रिडले भाल्लाडोलिडलाई ३-२ ले पराजित गर्दै शिर्षस्थानको बार्सिलोनासँग ३१ ले बराबरी बनाएको छ । 

तर, गोल अन्तरमा बार्सिलोना शीर्ष स्थानमा छ । लिगको तेस्रो स्थानमा बार्सिलोनाभन्दा एक खेल बढी खेलेको रियल मड्रिड छ । उसको खातामा २९ अंक छ । यो बार्सिलोना र एथ्लेटिकोको भन्दा मात्रै २ अंकले कमी हो ।

चौथो स्थानमा रहेको सेल्भिल्लाको खातामा २८ अंक छ । उसले पनि आइतबार राति नै आफ्नो खेल खेल्दैछ । आज सेभिल्लाले आफ्नो खेल जिते अंकतालिकामा ३१ अंक बनाउने छ । 

रियल र एथ्लेटिकोलाई पछि पार्दै दोस्रो स्थानमा उक्लिने छ । आज सबैभन्दा बढी दबाब बार्सिलोनामाथि हुनेछ । साबिक विजेतासमेत रहेको लिगमा पकड जमाइराख्न आजको खेलमा जित्नैपर्ने हुन्छ । पराजित भए वा बराबरीमा रोकिए उसको शीर्ष स्थान कुनै पनि खेलबाट खोसिन सक्छ ।

गत सिजनको दोस्रो भेटमा लेभान्टेले बार्सिलोनालाई ५-४ ले पराजित गरेको थियो । आइतबार रातिनै हुने अन्य खेलमा सेभिल्लले जिरोनसँग ४:४५ बले खेल्दै छ ।

त्यस्तै स्पानियोलले रियल बेटिससँग ९ बजे राति, हुएस्काले भिल्लारियलसँग राति ११:४५ बजे तथा अलाभेसले एटलेटिको बिल्बाओसँग राति १:४५ बजे खेल्दै छ ।