युभेन्टसको जितमा रोनाल्डोको गोल 

एजेन्सी- पोर्चुगिज स्टार खेलाडी क्रिस्टियानो रोनाल्डोको निर्णायक गोलले युभेन्टस विजयी भएको छ । शनिबार राति भएको इटालियन सिरी ए फुटबलमा पेनाल्टीमार्फत गोल गरेपछि युभेन्टसले टोरिनोलाई १-० ले पराजित गरेको हो । 

निकै नै प्रतिस्पर्धात्मक बनेको खेलमा पहिलो हाफ गोल रहित बराबरीमा सक्किएको थियो । खेलको एक मात्र निर्णायक गोल दोस्रो हाफमा सम्भव भएको हो । 

खेलको ७०औं मिनेटमा पाएको पेनाल्टीको सदुपयोग गर्दै रोनाल्डेले गोल गरेका थिए । त्यसपछि थप गोल निस्कन नसक्दा युभेन्टस १-० ले विजयी हुन सफल भयो ।

जितपछि युभेन्टसले आफ्नो अपराजित यात्रा कायमै राखेको छ । यससँगै दोस्रो स्थानको एसएससी नेपोलीमाथि ११ अंकको अग्रता बनाएको छ । युभेन्टसको १६ खेलबाट ४६ अंक पुगेको छ । नेपोलीले एक खेल कम खेलेको छ ।