थ्रीस्टारको जितमा रन्जितको निर्णायक गोल

काठमाडौं- सहिद स्मारक ‘ए’ डिभिजन लिग फुटबलमा रुस्लान थ्री स्टार क्लबले मछिन्द्र फुटबल क्लबलाई पराजित गरेको छ । हलचोकस्थित एपीएफ मैदानमा शनिबार भएको खेलमा थ्री स्टारले मछिन्द्रलाई १-० को झिनो अन्तरले पराजित गरेमो हो । 

पहिलो हाफमा भएको खेलको एक मात्र गोल नै खेलको जितका लागि निर्णायक बन्यो । खेलको १२ औं मिनेटमा थ्री स्टारले खेलमा अग्रता लिएको थियो । १२ औ मिनेटमा डिफेन्डर रन्जित धिमालले पेनाल्टीकार्फत गोल गर्दै थ्री स्टारलाइ खग्रता दिलाएका थिए । 

उनको एक मात्र गोल नै थ्री स्टारको जितका लागि निर्णाय गोल बन्यो । थ्री स्टारका मिडफिल्डर निराजन खड्काले प्रहार गरेको बल मछिन्द्रका डिफेन्डर अन्जन देबकोटाले हातले रोकेपछि ललितपुरे क्लबले पेनाल्टीको अवसर पाएको थियो । 

३४ औं मिनेटमा थ्री स्टारका अल्बर्टको शसक्त प्रहार मछिन्द्रका गोलकिपर दिप कार्कीले उत्कृष्ट बचाउ गरेका थिए । ८२ औ मिनेटमा मछिन्द्रका अनिल गुरुङको प्रहार थ्री स्टारका गोलकिपर एलन न्यौपानेले उत्कृष्ट ढङ्गले बचाउ गरेका थिए । 

जितपछि थ्री स्टारले ८ खेलबाट २१ अंक जोड्दै तालिकाको दोस्रो स्थानमा उक्लिएको छ । मछिन्द्र ३ अंक सहित तालिकाको पुछारमा छ ।