आर्मीलाई पराजित गर्दै मनाङ शीर्षस्थानमा यथावत

काठमाडौं- सहिद स्मारक ‘ए’ डिभिजन लिग अन्तर्गत मनाङ मस्र्याङदी क्लबले त्रिभुवन आर्मी क्लबलाई पराजित गर्दै शिर्ष स्थानमा यथावत रहेको छ । एनफ कम्प्लेक्समा शुक्रबारको भएको खेलमा आर्मीलाई १-० ले पराजित गर्दै मनाङले शिर्षस्थानमा यथावत रहेको हो । 

खेलको एक मात्र गोल पहिलो हाफमा सम्भव भएको थियो । पहिलो हाफ तथा खेलको एक मात्र निर्णायक गोल विशाल राईले गरेका थिए । उनले ३१ औं मिनेटमा गोल गर्दै मनाङलाई सुरुवाती अग्रता दिलाएका थिए । 

हेमन गुरुङलाई आर्मीका खेलाडीले फल हानेपनि रेफ्रीले एडभान्टेज दिएपछि आडेलाजा सोमिडेको पासमा विशालले गोल गरेका हुन् । दोस्रो हाफमा आर्मीले दबाब बनाएपनि गोल गर्न सकेन । 

यस जितसँगै मनाङले शीर्ष स्थानमा ३ अंकको अग्रता कायम नै गरेको छ । मनाङले लगातार आठौं जित दर्ता गर्दै २४ अंक जोडेको छ । आर्मी भने ८ खेलमा ५ जित, २ बराबरी र १ हारसँगै १७ अंकमा नै सिमित छ । 

आर्मी अंक तालिकाको चौथो स्थानमा छ । दोस्रो स्थानमा रहेको संकटाको २१ अंक छ भने रुस्लान थ्री स्टार १८ अंकमा छ ।