सिटी समूह विजेता बन्दै नकआउट चरणमा

एजेन्सी- इंग्लिश क्लब म्यानचेस्टर सिटी समूह विजेता बन्दै युईएफए च्याम्पियन्स लिग फुटबलको नकआउट चरणमा प्रवेश गरेको छ । बुधबार राति भएको समूह चरणको अन्तिम खेलमा जर्मन क्लब होफेनहामलाई २-१ ले पराजित गर्दै सिटी समूह ‘एफ’ को विजेता बनेको हो । 

घरेलु मैदानमा सिटीलाई जित दिलाउन लोरी साने एक्लैले दुई गोल गरे । होफेनहाइमका आन्द्रेज कर्मारीचले एक गोल फर्काएका थिए । खेलमा सुरुवाती अग्रता भने होफेनहामले बनाएको थियो । अग्रता जा्गाउन नसक्दा होफेनहाम २-१ ले पराजित हुन पुगेको हो । 

खेलको १६ औं मिनेटमा पेनाल्टीमा कर्मारीचले गोल गर्दै पाहुना टोलीलाई अग्रता दिलाएका थिए । तर, पहिलो हाफको अन्तिम मिनेटमा सिटीका सानेले गोल गर्दै खेल १-१ को बराबरीमा ल्याए । 

त्यसपछि खेलको ६१ औं मिनेटमा सानेले व्यक्तिगत दोस्रो गोल गर्दै सिटीलाई २-१ को जित दिलाए । यस समूहबाट लियोनले समूह उपविजेता बन्दै नकआउट चरणमा स्थान बनायो । ८ अंक जोडेको लियोनले बुधबार राति शख्तर डोनेक्स्टसंग १-१ गोलको बराबरी खेलेको थियो ।