थाहा बन्यो जिल्लाकै उत्कृष्ट नगरपालिका

मकवानपुर- मकवानपुर जिल्लाको थाहा नगरपालिका फेरि पनि उत्कृष्ट नगरपालिका बनेको छ। अघिल्ला वर्षजस्तै यो वर्ष पनि थाहा नगर जिल्लामै उत्कृष्ट बनेको हो।

जिल्ल्ला समन्वय समितिको छैठौँ जिल्ला सभाको अवसर पारेर थाहा नगरपालिकालाई जिल्लाका स्थानीय तहहरूमध्ये उत्कृष्ट घोषणा गरिएको हो। यो घोषणासँगै थाहा नगर लगातार ३ वर्ष जिल्लामा उत्कृष्ट हुने नगरपालिका बनेको छ।

जिल्ला समन्वय समितिको मूल्यांकनको आधारमा हुने उक्त घोषणा छैठौं जिल्ला सभाको कार्यक्रममा हेटौंडामा घोषणा गरिएको हो। उत्कृष्ट बनेको थाहा नगरलाई बागमती प्रदेशका मुख्यमन्त्री डोरमणि पौडेलले नगर प्रमुख लवशेर विष्ट र उपप्रमुख खड्ग गोपालीलाई सम्मानपत्र हस्तान्तरण गरेका छन्।

कार्य प्रगति तथा स्थानीय तह संस्थागत  क्षमता स्वमूल्यांकन कार्यविधि २०७७ को अंकभारलाई समेत आधार मानी जिल्ला समन्वय समिति मकवानपुरले पुरस्कृत गरेको हो। जिल्ला समन्वय समिति प्रमुख रघुनाथ खुलालका अनुसार थाहा नगरले ७५.५ अंक प्राप्त गरेको छ।

नगरपालिका लगातार तेस्रो पटक उत्कृष्ट बनेसँगै नगर प्रमुख विष्टले जनप्रतिनिधि तथा कर्मचारीहरूमा आभार ब्यक्त गरेका छन्। पालिकाको सफलता नै सबै नगरबासीको सफलता भएको बताउँदै विष्टले आगामी दिनमा थप उचाई प्राप्त गर्नका लागि पनि सहयोगको आवस्यकता रहेको बताएका थिए।